ایرانی سرکاری ٹیلی وژن کے مطابق، ایران کی افواج نے آج ہفتے کے روز شمال مغربی علاقے میں اسرائیلی جاسوس ڈرون طیاروں کو مار گرایا۔

رپورٹ میں بتایا گیا کہ یہ ڈرون طیارے ایرانی فضائی حدود میں “جاسوسی اور نگرانی” کے مشن پر داخل ہوئے تھے، یہ صوبہ سلماس کی سرحدی کے نزدیک گرا دیے گئے۔

ایرانی میڈیا کے مطابق اسرائیلی فضائی حملوں میں تہران کے مہرآباد ہوائی اڈے پر واقع ایک ہینگر کو نشانہ بنایا گیا، جس میں لڑاکا طیارے موجود تھے۔

دوسری جانب، ایرانی فوج نے اعلان کیا ہے کہ آئندہ حملوں میں “تقریباً دو ہزار میزائل اسرائیل کی جانب داغے جائیں گے” اور خبردار کیا کہ “ہمارے میزائل حملے سابقہ حملوں کے مقابلے میں بیس گنا زیادہ شدید ہوں گے”۔

مزید پڑھیں: اسرائیل اپنی سنگین غلطی کے نتائج بھگتنے کے مرحلے میں داخل ہو چکا ہے: کمانڈر پاسداران انقلاب

ایرانی پاسداران انقلاب نے بھی اعلان کیا ہے کہ “جب تک ضرورت محسوس ہوگی، اسرائیل کے خلاف کارروائیاں جاری رہیں گی”۔

اس کے جواب میں، اسرائیلی فوج کے جاری کردہ بیان میں کہا گیا کہ ملک کے مختلف علاقوں میں ایرانی ڈرون طیاروں کی موجودگی کے بعد سائرن بجا دیے گئے ہیں۔

بیان کے مطابق، اسرائیلی فوج نے کئی ڈرون طیاروں کو فضا میں ہی تباہ کر دیا۔ اسرائیلی وزیر دفاع یسرائیل کاتز نے خبردار کیا کہ “ایران کو ہمارے خلاف میزائل داغنے کی بھاری قیمت چکانا پڑے گی”۔

ادھر اسرائیلی فضائیہ کے سربراہ نے کہا “ہم نے تہران میں اہم اور مؤثر فضائی حملے کیے، جن میں ایران کے فضائی دفاعی نظام سمیت سیکڑوں اہداف کو نشانہ بنایا گیا۔ ہمارے جنگی طیارے تہران کی فضاؤں میں پرواز کرتے ہوئے ان حملوں میں شریک ہوئے”۔