سپریم کورٹ بار ایسوسی ایشن نے وفاقی بجٹ 2025-26 کو شدید تنقید کا نشانہ بناتے ہوئے اسے عوام دشمن اور غیر متوازن قرار دیا ہے۔

بار کی جانب سے جاری کردہ ایک باضابطہ اعلامیے میں کہا گیا ہے کہ یہ بجٹ عوام کو ریلیف فراہم کرنے کے بجائے ان کی مشکلات میں مزید اضافہ کرے گا۔

اعلامیے میں کہا گیا ہے کہ موجودہ معاشی حالات، بلند افراطِ زر اور بے قابو مہنگائی کے تناظر میں یہ بجٹ غریب اور متوسط طبقے کے لیے مزید غیرمحفوظ ثابت ہوگا۔

حکومت کی پالیسیوں پر سخت تنقید کرتے ہوئے سپریم کورٹ بار نے کہا کہ مراعات یافتہ طبقے کو سبسڈی دینا جبکہ کم از کم اجرت کو صرف 37 ہزار روپے پر برقرار رکھنا سراسر ناانصافی ہے۔

مزید پڑھیں: پاکستان کا وفاقی بجٹ 2026 متوازن مگر چیلنجز سے بھرپور، ایس اینڈ پی گلوبل کا تجزیہ

سپریم کورٹ بار نے اعلیٰ عدلیہ، اسپیکر قومی اسمبلی، چیئرمین سینیٹ اور اراکینِ پارلیمنٹ کی تنخواہوں میں حالیہ اضافے پر بھی کڑی تنقید کی اور اسے غیر ضروری اخراجات میں شمار کیا۔

اعلامیے کے مطابق صرف وزارتیں ختم کر دینے سے عوامی مسائل حل نہیں ہوں گے بلکہ اصلاحات اور عملی اقدامات کی ضرورت ہے۔

بار نے بجٹ میں تعلیم اور صحت جیسے بنیادی شعبوں کے لیے واضح فنڈز مختص نہ کیے جانے پر افسوس کا اظہار کیا اور کہا کہ غیرترقیاتی منصوبوں پر بھاری رقوم مختص کرنا عوامی مفاد کے منافی ہے۔

مزید پڑھیں: وفاقی بجٹ کا مثبت ردعمل؛ 100 انڈیکس میں پہلی بار نیا ریکارڈ قائم، 1 لاکھ 24 ہزار کی سطح عبور

اعلامیے میں آئی ٹی، آن لائن کاروبار اور چھوٹے تاجروں پر نئے ٹیکسز کو معیشت کی ترقی کے لیے رکاوٹ قرار دیا گیا ہے۔ بار کے مطابق یہ ٹیکسز مہنگائی کے بوجھ میں مزید اضافہ کریں گے اور کاروباری طبقے کو نقصان پہنچائیں گے۔

سپریم کورٹ بار نے ایف بی آر میں موجود اختیارات رکھنے والے افسران کی من مانی پر شدید تشویش کا اظہار کرتے ہوئے کہا کہ جب تک ادارے میں جامع اصلاحات نہیں کی جاتیں تب تک ٹیکس نیٹ کو مؤثر طور پر بڑھانا ممکن نہیں۔

اعلامیے میں بجٹ کو ایک بار پھر خسارے کا بجٹ قرار دیا گیا ہے، جو براہِ راست درمیانے اور نچلے طبقے پر مالی بوجھ ڈالے گا۔

بار نے مزید کہا کہ حکومتی فضول اخراجات، مالی بے احتیاطی اور غیر شفاف ترجیحات عوام میں بے چینی اور بداعتمادی کو جنم دے رہی ہیں۔