مودی سرکار ایک کے بعد ایک ہزیمت کا شکار ہورہی ہے، مودی کو جی 7 سربراہی اجلاس میں شرکت کا دعوت نامہ نہیں دیا گیا ہے۔

پاکستان سے جنگ کے بعد مودی سرکار کی عالمی سطح پر تنہائی بڑھتی جارہی ہے، کینیڈا میں شہریوں کے قتل میں ملوث ہونے کی وجہ سے ہندوتوا کے علمبردار بھارتی وزیراعظم کے تعلقات کینیڈا سے بھی سردمہری کا شکار ہے۔

عالمی ذرائع ابلاغ کے مطابق بھارتی وزیر اعظم مودی کو جی 7 اجلاس میں شرکت کی دعوت نہیں دی گئی ہے، جس کے بعد امکان ظاہر کیا جارہا ہے کہ مودی اب جی 7 سربراہی اجلاس میں شرکت نہیں کرسکیں گے۔

مزید پڑھیں: مودی سرکار کا یورینیم افزودگی کا جنون، بھارتی شہریوں کی زندگی جہنم بنا دی

ذرائع نے بتایا کہ نہ تو کینیڈا کی طرف سے بھارت سے اس دورے کے حوالے سے رابطہ کیا گیا ہے اور نہ ہی بھارتی فریق اس میں شرکت کا خواہشمند ہے، انہوں نے مزید کہا کہ اس طرح کے اعلیٰ سطحی دورے سے پہلے تعلقات میں بہتری آنی چاہیے۔

جی 7 دنیا کی سب سے زیادہ صنعتی معیشتوں کا ایک غیر رسمی گروپ ہے، جس میں فرانس، جرمنی، اٹلی، برطانیہ، جاپان، امریکا اور کینیڈا شامل ہیں، اس میں یورپی یونین (EU) بھی شرکت کرتا ہے، IMF، عالمی بینک اور اقوام متحدہ کو بھی مدعو کیا جاتا ہے۔

جی 7 کا اجلاس 15-17 جون تک کینیڈا کی میزبانی میں ہو رہا ہے، اجلاس میں جنوبی افریقہ، یوکرین اور آسٹریلیا بھی شرکت کریں گے، تاہم کینیڈا کی جانب سے بھارت کو کوئی سرکاری دعوت نامہ موصول نہیں ہوا ہے۔

یاد رہے کہ سابق کینیڈین وزیر اعظم جسٹن ٹروڈو نے کینیڈا میں نجر سنگھ کے قتل کا الزام نریندر مودی حکومت پر لگایا تھا۔ جس کے بعد سے دونوں ممالک کے درمیان تعلقات سرد مہری کا شکار ہے۔