عازمین حج نے حج 1446 ہجری کا آخری اہم رکن “رمیٔ جمرات” اتوار 8 جون کو مکمل کرلیا، جس کے بعد لاکھوں حجاجِ کرام منیٰ سے روانہ ہو رہے ہیں۔

اس موقع پر مشاعرِ مقدسہ میں سکیورٹی، رہنمائی اور نظم و ضبط کے غیر معمولی انتظامات دیکھنے میں آئے۔

عرب میڈیا کے مطابق حج کے آخری مراحل آج مکمل ہو رہے ہیں، اور بیشتر عازمینِ حج غروبِ آفتاب سے قبل مکہ مکرمہ واپس روانہ ہو جائیں گے، جہاں سے وہ اپنے اپنے ممالک کی طرف روانگی کے مراحل کا آغاز کریں گے۔

تاہم کچھ حجاج 13 ذوالحجہ (پیر 9 جون) کو ایامِ تشریق کے تیسرے دن کی رمی کے بعد منیٰ سے روانہ ہوں گے۔

منیٰ میں واقع عارضی خیمہ بستی، جو ہر سال صرف ایامِ حج میں آباد ہوتی ہے، اب اگلے سال تک غیر آباد ہو جائے گی۔

رمیٔ جمرات کے لیے بنائے گئے جدید جمرات پل پر آج حجاج کا غیر معمولی رش متوقع تھا، جس کے پیشِ نظر سکیورٹی فورسز، رضاکاروں اور رہنمائی ٹیموں کو بڑی تعداد میں تعینات کیا گیا۔

انتظامیہ نے حجاج کی سہولت کے لیے واپسی اور آمد کے راستوں کو علیحدہ کر رکھا ہے، جبکہ قطاروں اور رہنمائی کے نظام کو بہتر بنانے کے لیے تربیت یافتہ عملہ موجود ہے۔

یہ تمام اقدامات اس بات کو یقینی بنانے کے لیے کیے گئے کہ ہر حاجی پُرامن، آرام دہ اور محفوظ انداز میں رمیٔ جمرات مکمل کر سکے۔