سربراہ سونامی وارننگ سیل کراچی، چیف میٹرولوجسٹ امیر حیدر لغاری نے کراچی میں گزشتہ روز سے جاری زلزلوں کے جھٹکوں کو معمولی قرار دے دیا۔

انھوں نے کہا کہ کراچی میں لانڈھی کی فالٹ لائن گزشتہ روز سے فعال ہوئی ہے، جس میں جمع شدہ انرجی آہستہ آہستہ ریلیز ہورہی ہے، ایک سے دو دن تک شہر میں زلزلے کے جھٹکے محسوس کیے جائینگے، جس کے بعد زلزلے کے جھٹکوں کی شدت بتدریج کم ہوتی جائے گی۔

چیف میٹرولوجسٹ نے کہا کہ پریشان ہونے کی کوئی ضرورت نہیں ہے، زلزلے کی گہرائی کم ہے جسکی وجہ سے اسکو شدت کے ساتھ محسوس کیا گیا ہے، ورنہ اس میگنیٹیوٹ کے زلزلے محسوس بھی کم و بیش  ہوتے ہیں۔

انھوں نے کہا کہ کل شام سے اب تک ملیر، قائدآباد اور اطراف میں زلزلے کے 4 جھٹکے محسوس کیے جا چکے ہیں، جن کی شدت 3.6 اور گہرائی 10 کلومیٹر رہی۔

مزید پڑھیں: چلی میں 7.4 شدت کا طاقتور زلزلہ، سونامی الرٹ جاری، ساحلی علاقوں سے فوری انخلا کا حکم

چیف میٹرولوجسٹ کا بتانا تھا کہ گزشتہ روز آنے والے زلزلے کا مرکز قائد آباد کے قریب تھا، ایک اور زلزلے کا جھٹکا رات 1 بج کر 6 منٹ پر آیا تھا، رات گئے آنے والے زلزلے کی شدت 3.2 اور گہرائی 12 کلومیٹر تھی، رات گئے آنے والے زلزلے کا مرکز گڈاپ ٹاؤن کے قریب تھا۔

امیر حیدر کا کہنا تھا یہ زلزلے کے جھٹکے لانڈھی فالٹ ریجن میں آرہے ہیں، یہ زلزلے کے معمولی جھٹکے ہیں، اس فالٹ لائن پر آج تک بڑے زلزلہ کے جھٹکے نہیں آئے ہیں، کراچی کی دوسری فالٹ لائن تھانہ بولا خان کے قریب ہے، یہ دونوں متحرک فالٹ لائن ہیں۔

انہوں نے کہا کہ ان دنوں میں معمولی شدت کے زلزلے رپورٹ ہوتے ہیں، کیرتھر کے قریب بھی مین باؤنڈری لائن ہے، یہاں معتدل شدت کے زلزلے رپورٹ ہوتے رہتے ہیں، فالٹ لائن کو معمول پر آنے میں چند روز لگ سکتے ہیں، اس فالٹ لائن پر آئندہ چند روز تک زلزلے کے جھٹکے محسوس کیے جا سکتے ہیں۔