امریکی صدر ڈونلڈ ٹرمپ کی جانب سے غزہ میں جنگ بندی کا عندیہ دیئے جانے کے بعد غزہ پر اسرائیلی حملوں میں تیزی آگئی ہے۔

اسرائیلی فورسز نے غزہ میں شہریوں پر حملوں کا سلسلہ تیز کردیا ہے، جس کے نتیجے میں مزید 80 فلسطینی شہید ہوگئے ہیں، جبکہ سینکڑوں افراد کو زخمی بھی کیا جاچکا ہے، جس میں سے متعدد کی حالت تشویشناک بتائی جارہی ہے۔

عرب میڈیا کے مطابق غزہ کے مختلف اسپتالوں سے موصول ہونے والی معلومات کے مطابق بدھ کی صبح سے اب تک اسرائیلی فوج کی کارروائی میں کم از کم 80 فلسطینی شہید ہو چکے ہیں، جن میں 14بے گھر افراد وہ تھے جو امداد حاصل کرنے کیلئے جمع ہوئے تھے۔

مزید پڑھیں:اسرائیل کے غزہ میں مظالم تیز، گھروں پر بلڈوزروں سے چڑھائی، مزید 86 شہید

 غزہ کے اسپتالوں کے ذرائع کے مطابق بدھ کی صبح وسطی غزہ میں امداد کے منتظر فلسطینیوں پر اسرائیلی افواج کی فائرنگ سے شہادتیں ہوئیں۔

غزہ حکام کے مطابق مئی سے اب تک اسرائیل کی جانب سے امدادی مراکز پر 500 سے زائد فلسطینی شہید کیے گئے۔

دوسری جانب خان یونس میں حماس نے بڑی کارروائی کرتے ہوئے اسرائیلی بکتر بند گاڑی کو دھماکاخیز مواد لگا کر اُڑا دیا جس میں 7 اسرائیلی فوجی ہلاک ہوئے۔

مزید پڑھیں: دنیا صرف طاقت کی زبان سمجھتی ہے ! ، غزہ کے مظلوم تاحال جنگ بندی کے منتظر

ادھر امریکی صدر ڈونلڈ ٹرمپ نے دعویٰ کیا ہے کہ جنگ کے خاتمے کے لیے اہم پیش رفت ہو رہی ہے۔

امریکی صدر ڈونلڈ ٹرمپ نے امید ظاہر کی کہ اسرائیل اور حماس کے درمیان تقریباً دو سال سے جاری جنگ جلد اختتام کو پہنچ سکتی ہے۔