عالمی ادارے کی رپورٹ کے مطابق دنیا کی ٹاپ 350 یونیورسٹیوں میں پاکستان کی کوئی یونیورسٹی شامل نہیں ہے۔

یونیورسٹیوں کی درجہ  بندی کرنے  والے  عالمی  ادارے کیو  ایس  نے  سال 2026  کی جامعہ  درجہ بندی  رپورٹ  جاری کر دی ہے، جس میں وفاقی دارالحکومت اسلام آباد کی قائداعظم یونیورسٹی 354 ویں جبکہ نیشنل یونیورسٹی آف سائنس اینڈ ٹیکنالوجی (نسٹ) 371 ویں نمبر پر موجود ہے۔

مزید پڑھیں: چین کی مزید جامعات دنیا کے سو بہترین تعلیمی اداروں کی فہرست میں شامل

رپورٹ میں بتایا گیا ہےکہ  ملک کی سب سے بڑی کراچی یونیورسٹی 1001 یونیورسٹیوں میں جگہ بنانے میں کامیاب رہی، تاہم سندھ کی کوئی اور  یونیورسٹی دنیا کی 1500 بہترین یونیورسٹیوں کی فہرست میں جگہ بنانے میں ناکام رہی۔

کیو ایس عالمی درجہ بندی میں پاکستان کی مجموعی طور پر 18 یونیورسٹیوں کو عالمی سطح کے 1500 اعلیٰ اداروں میں شامل کیا گیا ہے۔

 درجہ بندی میں دیگر قابل ذکر پاکستانی یونیورسٹیوں میں پنجاب یونیورسٹی 542، لاہور یونیورسٹی آف منیجمنٹ سائنس(LUMS) 555  اور  یونیورسٹی آف ایگریکلچر فیصل آباد 654 شامل ہیں۔

مزید پڑھیں: بیوروکریٹس کی بطور وائس چانسلر تعیناتی کا ترمیمی بل، سندھ کی تمام جامعات میں آج بھی تدریسی عمل معطل

اسی طرح کامسیٹس یونیورسٹی اسلام آباد 664، پاکستان انسٹی ٹیوٹ آف انجنیئرنگ اینڈ اپلائیڈ سائنز  721، یو ای ٹی لاہور  801، پشاور یونیورسٹی 901،  آغا خان یونیورسٹی 1001 اور   یونیورسٹی آف منیجمنٹ اینڈ ٹیکنالوجی 1201 جب کہ اسلامیہ یونیورسٹی آف بہاولپور 1401 درجہ پر رہی۔

درجہ بندی میں 10 بہترین یونیورسٹیوں میں میساچوسٹس انسٹی ٹیوٹ آف ٹیکنالوجی (MIT) امریکا بدستور  پہلے نمبر  پر  براجمان ہے جب کہ امپیریل کالج لندن دوسرے اور  اسٹینفورڈ یونیورسٹی امریکا تیسرے نمبر  پر موجود ہے۔

اسی طرح آکسفورڈ یونیورسٹی چوتھے، ہارورڈ یونیورسٹی پانچویں، کیمبرج یونیورسٹی برطانیہ چھٹے، ای ٹی ایچ زیورخ ساتویں، نیشنل یونیورسٹی آف سنگاپور آٹھویں، یو سی ایل لندن نویں اور کیلیفورنیا انسٹی ٹیوٹ آف ٹیکنالوجی امریکا دسویں نمبر پر رہی ہیں۔