متحدہ عرب امارات کے شہر دبئی میں دنیا کے سب سے بلند میٹرو اسٹیشن کی تعمیر کا باقاعدہ آغاز کر دیا گیا ہے۔

اس اہم منصوبے کا سنگِ بنیاد یو اے ای کے نائب صدر، وزیرِ اعظم اور دبئی کے حکمران شیخ محمد بن راشد آل مکتوم نے رکھا۔

حکام کے مطابق یہ میٹرو اسٹیشن زمین سے 74 میٹر کی بلندی پر واقع ہوگا، جو دنیا بھر میں کسی بھی میٹرو اسٹیشن کی سب سے زیادہ اونچائی ہو گی۔

یہ اسٹیشن دبئی میٹرو کی نئی “بلیو لائن” کا حصہ ہو گا، جسے دبئی میٹرو کی 20ویں سالگرہ کے موقع پر 9 ستمبر 2029 کو عوام کے لیے کھولا جائے گا۔

مزید پڑھیں: کم وقت میں واشنگٹن کے تمام میٹرو اسٹیشنز گھومنے کا عالمی ریکارڈ قائم

بلیو لائن کیکل لمبائی131 کلومیٹرجبکہ اسٹیشنز کی مجموعی تعداد 14 ہیں، جن میں سے 5 زیرِ زمین ہوں گے، اہم انٹرچینج اسٹیشنز: لجداف، راشدیہ اور انٹرنیشنل سٹی ہونگے، جبکہ یہ  مردف، ورقا، سیلیکون اویسس، انٹرنیشنل اکیڈمک سٹی، فیسٹیول سٹی، دبئی کریک ہاربر، راس الخور انڈسٹریل ایریا کو مربوط کرے گا۔

اس منصوبے کے تحت دبئی کریک پر 1.3 کلومیٹر طویل پل بھی تعمیر کیا جائے گا، جو دبئی کریک کے اوپر بنایا جانے والا پہلا میٹرو ٹریک ہوگا۔

حکام کے مطابق بلیو لائن منصوبے کی مجموعی لاگت 56 ارب درہم ہے جو تقریباً 43 کھرب پاکستانی روپے بنتے ہیں، یہ دبئی کی شہری ترقی کی تاریخ کا ایک بڑا سرمایہ کاری منصوبہ شمار کیا جا رہا ہے۔

پہلے ہی دبئی کی ریڈ اور گرین لائنز لاکھوں افراد کو روزانہ سفری سہولیات فراہم کر رہی ہیں، جب کہ حکام کا کہنا ہے کہ بلیو لائن کے اسٹیشنز جدید ترین سہولیات، ماحول دوست تعمیراتی ڈیزائن اور ڈیجیٹل ٹیکنالوجی سے مزین ہوں گے۔

یہ منصوبہ نہ صرف دبئی کے عوام کے لیے ایک بڑا سفری سہولت فراہم کرے گا بلکہ شہر کی عالمی سطح پر بڑھتی ہوئی حیثیت کو مزید مستحکم کرے گا۔