ترکیہ کے جنوبی مغربی سیاحتی شہر مارمارس میں اچانک آنے والے 5.8 شدت کے زلزلے نے ہر چیز کو لرزا کر رکھ دیا۔

زلزلے کے جھٹکوں نے نہ صرف عمارتوں کو ہلایا بلکہ شہریوں کے دلوں میں بھی خوف کی ایک لہر دوڑا دی۔

زلزلہ مقامی وقت کے مطابق دوپہر کے وقت آیا، جب بیشتر لوگ اپنے گھروں یا دفاتر میں موجود تھے۔ جھٹکے اتنے شدید تھے کہ شہری خوفزدہ ہو کر گھروں اور عمارتوں سے باہر نکل آئے اور کھلے میدانوں اور محفوظ مقامات کی جانب دوڑنے لگے۔

غیر ملکی میڈیا رپورٹس کے مطابق، زلزلے کے باعث 70 سے زائد افراد زخمی ہوئے، جن میں ایک 14 سالہ لڑکی کی حالت نازک بتائی جا رہی ہے۔

مزید خبریں: ترکیہ اور شام میں زلزلہ: ہلاکتوں کی تعداد 21 ہزار سے تجاوز کرگئی، مزید اضافے کا خدشہ

کئی افراد اس وقت زخمی ہوئے جب وہ اپنی جان بچانے کے لیے بلند عمارتوں سے چھلانگ لگاتے ہوئے نیچے گرے۔

ترکیہ کے وزیر داخلہ نے سوشل میڈیا پر بیان جاری کرتے ہوئے کہا ہے کہ تاحال کسی رہائشی عمارت کے گرنے یا بڑے پیمانے پر تباہی کی اطلاع موصول نہیں ہوئی، تاہم خوف کے مارے کئی افراد نے بلند عمارتوں سے چھلانگ لگا دی، جس کی وجہ سے زخمیوں کی تعداد بڑھی۔

زلزلے کے بعد آفٹر شاکس کا خطرہ موجود ہے اور ریسکیو ٹیموں کو ہائی الرٹ کر دیا گیا ہے۔ متاثرہ علاقے میں ایمرجنسی نافذ کر دی گئی ہے جبکہ اسپتالوں میں الرٹ جاری ہے۔

ماہرین ارضیات کے مطابق زلزلہ زمینی سطح سے نسبتاً کم گہرائی پر آیا، جس کی وجہ سے اس کے جھٹکے زیادہ شدت کے ساتھ محسوس کیے گئے۔

واضح رہے کہ 2023 میں بھی ترکیہ اور شام میں آنے والے زلزلے میں ہزاروں افراد جاں بحق ہو گئے تھے۔