وزیراعظم پاکستان محمد شہباز شریف نے اپنے سرکاری دورۂ متحدہ عرب امارات کے دوران یو اے ای کے صدر اور ابوظہبی کے حکمران شیخ محمد بن زاید النہیان سے ملاقات کی۔

ملاقات میں دوطرفہ تعلقات، اقتصادی تعاون، علاقائی صورتِ حال اور عالمی امور پر تفصیلی تبادلہ خیال کیا گیا۔

ملاقات کے دوران دونوں رہنماؤں نے پاکستان اور یو اے ای کے درمیان تاریخی اور برادرانہ تعلقات کو مزید وسعت دینے کے عزم کا اعادہ کیا۔ خاص طور پر اقتصادی، تجارتی اور ترقیاتی شعبوں میں تعاون بڑھانے پر اتفاق کیا گیا۔

وزیراعظم شہباز شریف نے پاکستان میں اماراتی سرمایہ کاری کو سراہتے ہوئے کہا کہ یو اے ای کی جانب سے مختلف ترقیاتی منصوبوں میں تعاون، پاکستان کی معاشی ترقی میں اہم کردار ادا کر رہا ہے۔

ملاقات میں علاقائی اور عالمی امور پر بھی غور کیا گیا، خاص طور پر جنوبی ایشیا میں امن و استحکام کے حوالے سے بات چیت ہوئی۔ وزیراعظم نے پاکستان اور بھارت کے درمیان کشیدگی میں کمی کے لیے یو اے ای کی قیادت کے تعمیری اور مثبت کردار کو سراہا۔

دونوں رہنماؤں نے دوطرفہ تعلقات میں جاری پیش رفت پر اطمینان کا اظہار کرتے ہوئے کہا کہ تمام سطحوں پر قریبی رابطے برقرار رکھنے اور علاقائی امن و خوشحالی کے مشترکہ اہداف کو فروغ دینے کے لیے مل کر کام جاری رکھا جائے گا۔

وزیراعظم شہباز شریف نے یو اے ای کے صدر کو جلد پاکستان کا دورہ کرنے کی باضابطہ دعوت کا اعادہ بھی کیا۔

اس اہم ملاقات کے دوران نائب وزیراعظم و وزیر خارجہ محمد اسحاق ڈار، چیف آف آرمی اسٹاف فیلڈ مارشل سید عاصم منیر، وزیر داخلہ سید محسن رضا نقوی، وزیر اطلاعات و نشریات عطاء اللہ تارڑ اور وزیراعظم کے معاون خصوصی سید طارق فاطمی بھی موجود تھے۔