سندھ پولیس کے پروفیشنل باکسر، شہیر آفریدی، امریکہ روانہ ہو گئے ہیں جہاں وہ برمنگھم، الاباما میں ہونے والے ورلڈ پولیس ایمپائر گیمز میں پاکستان کی نمائندگی کریں گے۔

یہ ایونٹ 28 جون سے 7 جولائی تک جاری رہے گا جس میں دنیا بھر سے 80 سے زائد ممالک کے پولیس ایتھلیٹس شرکت کریں گے۔

شہیر آفریدی نے ایونٹ سے قبل اپنے عزم کا اظہار کرتے ہوئے کہا کہ جیسے پہلے پاکستان کے لیے کامیابیاں حاصل کیں، اس مرتبہ بھی میں گولڈ میڈل جیتنے کی بھرپور کوشش کروں گا۔

انہوں نے مزید کہا کہ پولیس ایمپائر امیچرز مقابلوں میں گولڈ میڈل جیتنا میرے لیے ایک بڑا چیلنج اور مقصد ہے، اور میں اپنی محنت اور لگن سے اس میں کامیاب ہوں گا۔

شہیر آفریدی نے آئی جی سندھ غلام نبی میمن کا شکریہ ادا کیا اور کہا کہ آئی جی سندھ کی جانب سے ملنے والی حمایت اور تعاون کے لیے میں بے حد مشکور ہوں۔ ان کی مدد سے ہی میں اس ایونٹ میں پاکستان کا نام روشن کرنے کے لیے تیار ہوں۔

یہ ایونٹ دنیا بھر کے پولیس ایتھلیٹس کے لیے ایک اہم پلیٹ فارم فراہم کرتا ہے جہاں وہ اپنی مہارت کا مظاہرہ کرتے ہیں اور مختلف کھیلوں میں گولڈ میڈلز کے لیے مقابلہ کرتے ہیں۔

شہیر آفریدی کی شرکت سندھ پولیس کی جانب سے بین الاقوامی سطح پر پولیس ایتھلیٹس کی حمایت کا ایک اہم قدم ہے، جو نہ صرف سندھ بلکہ پورے پاکستان کے لیے ایک فخر کی بات ہے۔