گلوبل مارچ ٹو غزہ میں شرکت کے لیے مصر پہنچنے والے جنوبی افریقی رہنما نیلسن منڈیلا کے نواسے زویلیویلی منڈیلا (Zwelivelile Mandela) کا پاسپورٹ مصری حکام نے قاہرہ کے ایک چیک پوائنٹ پر ضبط کر لیا۔

زویلیویلی منڈیلا نے سوشل میڈیا کے ذریعے بتایا کہ وہ اس وقت قاہرہ میں ایک چیک پوائنٹ پر موجود ہیں جہاں ان کا پاسپورٹ بغیر کسی وجہ کے ضبط کر لیا گیا ہے۔

یاد رہے کہ “گلوبل مارچ ٹو غزہ” ایک بین الاقوامی امن مارچ ہے، جس کا مقصد غزہ پر اسرائیلی ناکہ بندی کے خلاف آواز بلند کرنا اور انسانی امداد کی راہ ہموار کرنا ہے۔ اس مارچ میں دنیا بھر کے 80 سے زائد ممالک سے تقریباً 4,000 رضاکاروں کی شرکت متوقع ہے۔

مزید پڑھیں: اسرائیلی محاصرہ توڑنے کے لیے ہزاروں افراد کا مصر سے غزہ کی طرف مارچ

مارچ کے منتظمین کا کہنا ہے کہ اسرائیلی ناکہ بندی نے غزہ کو قحط کے دہانے پر پہنچا دیا ہے، جہاں شہریوں کو بنیادی ضروریات زندگی جیسے خوراک، پانی اور ادویات کی شدید قلت کا سامنا ہے۔

اقوام متحدہ اور مختلف عالمی اداروں کی رپورٹوں کے مطابق، اکتوبر 2023 سے جاری اسرائیلی بمباری میں اب تک 54 ہزار سے زائد فلسطینی شہید اور 1 لاکھ 26 ہزار سے زائد زخمی ہو چکے ہیں۔

اسرائیل کی جانب سے غزہ کی ڈیل توڑنے اور مسلسل محاصرے کے باعث صورتحال مزید ابتر ہو گئی ہے۔ موجودہ حالات میں گلوبل مارچ ٹو غزہ کو ایک اہم علامتی اقدام کے طور پر دیکھا جا رہا ہے، جو عالمی برادری کی توجہ فلسطینیوں کے بحران کی طرف مبذول کرانے کی کوشش ہے۔