وزارت خزانہ نے ماہانہ معاشی آؤٹ لک رپورٹ جاری کردی ہے، رپورٹ کے مطابق رواں مالی سال کے 11 ماہ میں ترسیلات زر، برآمدات اور درآمدات میں اضافہ ریکارڈ کیا گیا ہے۔

رپورٹ کے مطابق بیرونی سرمایہ کاری اور روپے کی قدر میں کمی ریکارڈ کی گئی، جبکہ  مالی ذخائر، ایف بی آر محصولات اور نان ٹیکس آمدنی میں اضافہ ہوا ہے۔ مالیاتی خسارے میں کمی ریکارڈ کی گئی اور پرائمری بیلنس سرپلس رہا۔

مزید پڑھیں: ملک کے تین بڑے ایئرپورٹس کو آؤٹ سورس کرنے کا فیصلہ

رپورٹ میں کہا گیا ہے کہ گزشتہ مالی سال کے مقابلے میں رواں مالی سال ترسیلات زر میں 28.8 فیصد اضافہ ہوا، اور ترسیلات زر 27 ارب ڈالر سے بڑھ کر 35 ارب ڈالر کے قریب پہنچ گئیں۔

سالانہ بنیادوں پر برآمدات میں اضافہ اور ماہانہ بنیادوں پر کمی ریکارڈ کی گئی، مئی 2025 میں برآمدات 2.4 ارب ڈالر ریکارڈ کی گئی ،مئی  2024 میں برآمدات 3 ارب ڈالر سے زیادہ تھیں۔

رپورٹ کے مطابق رواں مالی سال درآمدات میں بھی 11.5 فیصد کا اضافہ ریکارڈ کیا گیا، بیرونی سرمایہ کاری میں 14.4 فیصد کی کمی ہوئی۔

مزید پڑھیں: وہ ممالک جو اپنی کرنسی بھی دوسرے ملکوں سے چھپواتے ہیں

آؤٹ لک رپورٹ کے مطابق ایف بی آر محصولات میں رواں مالی سال 25.9 فیصد اضافہ ہوا، نان ٹیکس آمدنی میں 68.1 فیصد کا اضافہ ریکارڈ کیا گیا۔

رپورٹ میں کہا گیا ہے کہ 11 ماہ میں مہنگائی کی شرح 4.6 فیصد ریکارڈ کی گئی، بڑی صنعتوں کی پیداوار میں رواں مالی سال 1.52 فیصد کی کمی ہوئی، پالیسی ریٹ 20.5 فیصد سے کم ہوکر 11 فیصد پر آگیا۔

رپورٹ کے مطابق روپے کی قدر میں گزشتہ مالی سال کے مقابلے میں 5 روپے 3 پیسے کی کمی ہوئی ہے۔