چیئرمین پیپلزپارٹی بلاول بھٹو زرداری اور وزیراعظم کے معاون خصوصی طارق فاطمی کی قیادت میں 2 وفود دنیا کے مختلف ممالک کا دورہ کریں گے۔

ترجمان دفتر خارجہ کے مطابق پیپلز پارٹی کے چیئرمین بلاول بھٹو زرداری کی سربراہی میں پاکستانی وفد آج سے نیویارک، واشنگٹن ڈی سی، لندن اور برسلز کا دورہ کرے گا، جبکہ طارق فاطمی کی قیادت میں پاکستانی وفد آج سے ماسکو کا دورہ کرے گا۔

ان دوروں کا مقصد حالیہ بھارتی جارحیت کے تناظر میں پاکستان کا موقف عالمی برادری کے سامنے پیش کرنا ہے، وفد دنیا کو پاکستان کے ذمہ دارانہ اور محتاط طرزِ عمل سے آگاہ کرے گا۔

ترجمان دفتر خارجہ کا کہنا ہے کہ بھارت کے غیرذمہ دارانہ اور جارحانہ اقدامات بین الاقوامی قانون کی کھلی خلاف ورزی ہیں۔ پاکستانی وفود تنازع اور محاذ آرائی کے بجائے مکالمے اور سفارت کاری کو ترجیح دینے پر زور دیں گے۔

طارق فاطمی کی سربراہی میں جانے والے وفد میں وفاقی وزیر مصدق ملک، سینیٹر شیری رحمان، حنا ربانی کھر، خرم دستگیر خان، فیصل سبزواری، اور سینیٹر بشریٰ انجم بٹ شامل ہیں۔

اس کے علاوہ، دو سابق سیکرٹری خارجہ جلیل عباس جیلانی اور تہمینہ جنجوعہ بھی وفد کا حصہ ہوں گے۔

یہ دورہ ایک ایسے وقت میں ہو رہا ہے جب پاکستان اور روس کے تعلقات میں نمایاں بہتری آئی ہے۔ دونوں ممالک نے 2024 میں ماسکو میں ہونے والے پاکستان-روس تجارتی اور سرمایہ کاری فورم کے دوران پہلی بارٹر ٹریڈ معاہدے پر دستخط کیے تھے۔

علاوہ ازیں، پاکستانی حکومت کی ہدایت پر، اعلیٰ سطح کا کثیر الجماعتی وفد آج سے نیویارک، واشنگٹن ڈی سی، لندن اور برسلز کا دورہ کرے گا۔ اس وفد کی قیادت پاکستان پیپلز پارٹی کے چیئرمین بلاول بھٹو زرداری کر رہے ہیں۔

یہ اقدامات پاکستان کی عالمی سطح پر اپنی پوزیشن مستحکم کرنے اور بھارتی جارحیت کے خلاف عالمی حمایت حاصل کرنے کی کوششوں کا حصہ ہیں۔