ایشین کرکٹ کونسل (ACC) نے ویمنز ایمرجنگ ٹیمز ایشیا کپ ملتوی کرنے کا فیصلہ کیا ہے، یہ ایونٹ شیڈول کے مطابق 6 جون 2025 سے سری لنکا میں شروع ہونا تھا۔

سری لنکن کرکٹ بورڈ کے صدر شمی سلوا نے اے سی سی کو ایک خط لکھا تھا جس میں سری لنکا میں خراب موسم اور چکن گونیا بیماری کے پھیلاؤ کے باعث صحت سے متعلق خدشات کا ذکر کیا گیا تھا۔ اے سی سی نے شمی سلوا کی درخواست پر ٹورنامنٹ کو ملتوی کرنے کا فیصلہ کیا۔

اے سی سی کے صدر محسن نقوی نے کہا کہ ہم اس ٹورنامنٹ کی اہمیت کو تسلیم کرتے ہیں جو ایشیا میں خواتین کرکٹ کے مستقبل کی تشکیل میں کلیدی کردار ادا کرتا ہے۔

مزید پڑھیں: پاکستان کو ایشین کرکٹ کونسل کی صدارت مل گئی

انہوں نے مزید کہا کہ “ہم جلد از جلد نئی تاریخوں کے تعین کے لیے بھرپور کوشش کریں گے۔”

ویمنز ایمرجنگ ٹیمز ایشیا کپ میں بھارت، پاکستان، سری لنکا، بنگلہ دیش، یو اے ای، نیپال، تھائی لینڈ اور ملائیشیا کی ٹیمیں حصہ لیتی ہیں۔ یہ ٹورنامنٹ خواتین کرکٹرز کے لیے اپنی صلاحیتوں کو نکھارنے اور بین الاقوامی سطح پر مقابلہ کرنے کا ایک اہم موقع فراہم کرتا ہے۔

اے سی سی نے اس ٹورنامنٹ کی نئی تاریخوں کا جلد اعلان کرنے کا عزم ظاہر کیا ہے۔ تمام شریک ٹیموں، کھلاڑیوں، کمرشل پارٹنرز اور دیگر اسٹیک ہولڈرز کے تعاون کی قدر کی گئی ہے۔

ویمنز ایمرجنگ ٹیمز ایشیا کپ خواتین کرکٹ کے فروغ کے لیے ایک اہم قدم ہے، اور اے سی سی اس کی کامیابی کے لیے پرعزم ہے۔