مریخ سے آیا ہوا سب سے بڑا پتھر جو زمین پر دریافت کیا گیا، نیویارک میں ہونے والی معروف نیلام گھر سوتھبیز کی ایک نیلامی میں 5.3 ملین امریکی ڈالر میں فروخت ہو گیا۔

غیر ملکی میڈیا کے مطابق یہ قیمتی شہابی پتھر ایک گمنام خریدار نے حاصل کیا ، پاکستانی روپے میں اس پتھر کی قیمت ڈیڑھ ارب سے زائد بنتی ہے۔

54 پاؤنڈ وزنی سرخی مائل بھورے رنگ کا یہ پتھر، جس کا نام NWA 16788 ہے، مریخی شہابیوں میں سب سے بڑا ٹکڑا ہے جو زمین پر ملا ہے۔

سوتھبیز کے مطابق یہ پتھر مریخ سے آنے والے اگلے سب سے بڑے پتھر سے 70 فیصد بڑا ہے، اور تقریباً 15 انچ لمبا ہے۔

نیلامی کی بولی 2 ملین ڈالر سے شروع ہوئی تھی اور بالآخر 4.3 ملین ڈالر پر بند ہوئی، جب کہ ٹیکس اور فیس ملا کر کل قیمت 5.3 ملین ڈالر بنی۔

سوتھبیز کی نائب چیئرپرسن برائے سائنس و نیچرل ہسٹری، کیسانڈرا ہیٹن نے کہا، یہ مریخ کا سب سے بڑا پتھر ہے جو زمین پر موجود ہے۔ خوش قسمتی سے یہ پتھر سمندر میں گرنے کے بجائے خشکی پر گرا، جہاں اسے دریافت کیا جا سکا۔

سائنس دانوں کے مطابق یہ پتھر مریخ پر ایک بڑے شہابیے کے ٹکراؤ سے وہاں کی سطح سے الگ ہوا اور تقریباً 140 ملین میل کا سفر طے کر کے زمین پر آ گرا۔

یہ ٹکڑا نومبر 2023 میں نائیجر کے سہارا ریگستان میں واقع آگادیز کے علاقے سے ایک شہابیہ شکاری کو ملا۔۔

سائنسی تجزیے کے مطابق یہ پتھر اولیوین-گبروک شیرگوٹائٹ قسم سے تعلق رکھتا ہے، جو مریخی شہابیوں کی ایک نسبتاً نئی دریافت شدہ قسم ہے۔

اس کی ساخت میں 21.2 فیصد ماسکیلینائٹ نامی شیشہ بھی شامل ہے، جو مریخ پر شہابیے کے زوردار تصادم سے پیدا ہوا۔

دنیا بھر میں اب تک 77,000 سے زائد شہابیے تسلیم کیے گئے ہیں، جن میں صرف 400 مریخ سے آئے ہوئے ہیں۔ زمین پر صرف 19 ایسے گڑھے موجود ہیں جو شہابیوں کے اس حجم کے پتھروں کو پیدا کر سکتے ہیں۔