فسادی تنظیموں کو مل کر روکنا ہوگا،پاک افغان وزرائے داخلہ کے درمیان کابل ملاقات میں اتفاق ہوگیا۔  وزیر داخلہ محسن نقوی نے افغان ہم منصب سراج الدین حقانی سے اہم ملاقات کی۔

کابل میں ہونے والی اس ملاقات میں  پاک افغان بارڈر مینجمنٹ اوردہشتگردی کے خاتمہ کیلیے باہمی تعاون مضبوط بنانے پر اتفاق کیاگیا۔

دونوں نے دوطرفہ تعلقات خصوصاً انسداد دہشتگردی، دراندازی اورکالعدم تحریک طالبان کے حوالے سے تبادلہ خیال کیا۔

محسن نقوی کا افغان وزارت داخلہ آمد پرسراج الدین حقانی نے خیر مقدم کیا۔ دونوں رہنماؤں کے مابین پاکستان میں غیر قانونی طور پر مقیم افغان شہریوں کے وطن واپسی کے عمل پر گفتگو کی گئی۔

پاک افغان وزرائے داخلہ نے پاکستان اورافغانستان کے درمیان پرامن بقائے باہمی،استحکام اور تعاون کی ضرورت پر زور دیا۔

وزیر داخلہ محسن نقوی نے بتایاکہ دہشتگرد تنظیمیں فساد اور عدم استحکام کا باعث بن رہی ہیں جسے مل کر روکنا ہو گا۔

انہون نے کہاکہ پاکستان افغانستان کے ساتھ برادرانہ اور دیرپا تعلقات چاہتاہے۔

محسن نقوی نے کہاکہ پاکستان نے کئی دہائیوں تک لاکھوں افغان مہاجرین کی بے لوث مہمان نوازی کی۔ ان کاکہناتھاکہ افغان شہریوں کی قانونی طور پر آمد کے دروازے کھلے ہیں۔

سینیئرنائب افغان وزیر داخلہ ابراہیم سردار،نمائندہ خصوصی برائے افغانستان محمد صادق بھی ملاقات میں موجود تھے۔