کراچی کے قدیمی علاقے لیاری کی بغدادی کالونی میں زمین بوس ہونے والی رہائشی عمارت کے المناک واقعے کے بعد سندھ بلڈنگ کنٹرول اتھارٹی (SBCA) اور متعلقہ اداروں نے حفاظتی اقدامات مزید تیز کر دیے ہیں۔

حکام نے حادثے کے مقام کے قریب واقع مزید دو مخدوش عمارتوں کو فوری طور پر خالی کرانے کا حکم جاری کر دیا ہے، جب کہ مسماری کا عمل جلد شروع کیا جا رہا ہے۔

ایس بی سی اے کی ڈیمولیشن ٹیمیں پولیس نفری کے ہمراہ متاثرہ مقام پر پہنچ چکی ہیں۔ حکام کے مطابق مذکورہ دونوں عمارتیں  ایک پانچ منزلہ اور دوسری چھ منزلہ حالیہ حادثے کے بعد سے شدید متاثر ہو چکی ہیں اور ان کا ڈھانچہ غیر محفوظ قرار دے دیا گیا ہے۔

مزید پڑھیں: لیاری میں پانچ منزلہ رہائشی عمارت منہدم، 7 افراد جاں بحق، متعدد زخمی

ایس بی سی اے حکام کے مطابق دونوں عمارتوں کے مکینوں کو فوری طور پر گھر کا سامان نکالنے کی ہدایت دی گئی ہے، جس پر عملدرآمد جاری ہے۔

رہائشیوں کی جانب سے قیمتی اشیاء اور ضروری سامان کی منتقلی کے بعد ان عمارتوں کو مسمار کرنے کا عمل مرحلہ وار شروع کیا جائے گا۔

متعلقہ اداروں نے علاقے کو جزوی طور پر سیل کر دیا ہے تاکہ کسی قسم کے جانی نقصان سے بچا جا سکے۔ مقامی پولیس اور دیگر ریسکیو ٹیمیں موقع پر موجود ہیں تاکہ منتقلی اور مسماری کے دوران کسی ناخوشگوار صورتحال سے بچا جا سکے۔

مزید پڑھیں:  کراچی، لیاری ریسکیو آپریشن مکمل، 27 افراد جاں بحق

واضح رہے کہ چند روز قبل اسی علاقے میں ایک چھ منزلہ رہائشی عمارت زمین بوس ہو گئی تھی، جس کے نتیجے میں 27 افراد جاں بحق اور 10 زخمی ہو گئے تھے۔

ریسکیو اداروں نے مسلسل 60 گھنٹے تک ملبہ ہٹانے اور لاشوں کو نکالنے کے لیے امدادی کارروائیاں جاری رکھی تھیں۔

حادثے کے بعد شہری حلقوں کی جانب سے سندھ بلڈنگ کنٹرول اتھارٹی اور متعلقہ اداروں کی غفلت پر شدید تنقید کی جا رہی ہے اور مطالبہ کیا جا رہا ہے کہ پورے شہر میں مخدوش عمارتوں کی فوری نشاندہی کر کے کارروائی کی جائے تاکہ ایسے سانحات دوبارہ رونما نہ ہوں۔