چیئرمین پاکستان پیپلز پارٹی بلاول بھٹو زرداری نے 5 جولائی 1977 کو پاکستان کی تاریخ کا “سیاہ ترین دن” قرار دیتے ہوئے کہا کہ اس روز ایک “ٹین-پوٹ ڈکٹیٹر” نے عوام کی مرضی اور منتخب حکومت پر شب خون مار کر جمہوریت کو پیچھے دھکیل دیا۔

انہوں نے واضح کیا کہ اس اقدام کا مقصد عوام کی آواز کو دبانا، غریبوں کے وقار کو پامال کرنا اور عوام کی طاقت کو چھیننا تھا، لیکن “یہ خواب شہیدوں کے خون اور عوام کے دلوں میں زندہ رہا” ۔

مزید پڑھیں: سیاستدانوں کواپنے دائرے میں رہ کر کام کرنا ہوگا، بلاول بھٹو زرداری

 بلاول بھٹو زرداری نے کہا کہ اس آمریت کے نتیجے میں دہشت، مذہبی استحصال، فرقہ واریت اور جمہوری اداروں کی منظم تباہی نے پاکستان کے تنِ بدن پر گہرے زخم چھوڑے، جو آج بھی ہمارے معاشرے پر اثرانداز ہیں ۔

انہوں نے عہد کیا کہ بلاول بھٹو زرداری اور پیپلز پارٹی ذوالفقار علی بھٹو اور بینظیر بھٹو کے وژن کے لیے مسلسل جدوجہد جاری رکھے گی، ایک ایسا پاکستان جہاں عوام خودمختار ہوں، آئین کی حکمرانی ہو، اور پارلیمان و بیلٹ باکس سے بالاتر کوئی قوت نہ ہو۔

مزید پڑھیں: بلاول بھٹو زرداری کا شہیدذوالفقارعلی بھٹو کے یوم شہادت پر پیغام

بلاول بھٹو زرداری نے مزید کہا کہ پارٹی نے “کوڑے کھائے، جیلیں کاٹیں، پھانسیاں دیکھیں، شہادتیں دیں”، مگر اصولوں پر سمجھوتہ نہیں کیا؛ یہ جدوجہد تب تک جاری رہے گی جب تک پاکستان وہ جمہوری، پُرامن اور خوشحال ملک نہ بن جائے جس کا خواب شہید ذوالفقار علی بھٹو نے دیکھا تھا ۔