پاکستان شاہینز نے پروفیشنل کاؤنٹی کلب سلیکٹ الیون کے خلاف تین ون ڈے میچوں کی سیریز 1-2 سے جیت لی۔

سیریز کا فیصلہ کن تیسرا میچ پاکستان شاہینز نے شاندار کارکردگی کے ساتھ 5 وکٹوں سے اپنے نام کیا۔

تیسرے ون ڈے میں پاکستان شاہینز نے ٹاس جیت کر میزبان ٹیم کو پہلے بیٹنگ کی دعوت دی۔ پروفیشنل کاؤنٹی کلب سلیکٹ الیون کی ٹیم 46.4 اوورز میں 260 رنز بنا کر آؤٹ ہو گئی۔

اننگز میں اولی سکائیز نے شاندار بیٹنگ کرتے ہوئے 64 رنز بنائے، جس میں 2 چھکے اور 5 چوکے شامل تھے، جبکہ ٹام لیوس نے 49 رنز اسکور کیے، جس میں 3 چھکے اور 3 چوکے شامل تھے۔

دونوں بلے بازوں نے چوتھی وکٹ کی شراکت میں 86 رنز کا اضافہ کیا۔

پاکستان شاہینز کی جانب سے عبید شاہ نے شاندار بولنگ کا مظاہرہ کرتے ہوئے 41 رنز دے کر 4 وکٹیں حاصل کیں۔

جواب میں پاکستان شاہینز نے عمدہ بیٹنگ کا مظاہرہ کرتے ہوئے ہدف 43.5 اوورز میں 5 وکٹوں کے نقصان پر حاصل کر لیا۔

اوپننگ جوڑی نے مضبوط آغاز فراہم کیا۔ اذان اویس نے 1 چھکے اور 12 چوکوں کی مدد سے 88 رنز کی شاندار اننگز کھیلی، جبکہ شامل حسین نے 40 رنز بنائے۔

بعد میں محمد سلیمان نے 3 چھکوں اور 4 چوکوں کے ساتھ 44 رنز اسکور کیے۔

میچ کے اختتام پر حیدر علی نے جارحانہ انداز اپناتے ہوئے 55 رنز ناٹ آؤٹ بنائے، جس میں 5 چوکے اور 3 چھکے شامل تھے، اور ٹیم کو فتح سے ہمکنار کیا۔

ون ڈے سیریز کے بعد پاکستان شاہینز اب دو تین روزہ میچ کھیلے گی۔

پہلا میچ پروفیشنل کاؤنٹی کلب سلیکٹ الیون کے خلاف 29 تا 31 جولائی کو کھیلا جائے گا، دوسرا میچ ساؤتھ ایشین کرکٹ اکیڈمی اینڈ ایم سی سی ینگ کرکٹرز الیون کے خلاف 3 تا 5 اگست تک ہوگا۔