لاس اینجلس کے علاقے ولیمنگٹن میں بدھ کی شب زیر تعمیر سرنگ کے گرنے کے واقعے میں پھنسنے والے تمام 27 مزدوروں کو بحفاظت نکال لیا گیا۔

لاس اینجلس کی میئر کیرن باس نے تصدیق کی کہ تمام متاثرہ مزدور محفوظ اور خیریت سے ہیں۔

واقعہ کے فوراً بعد لاس اینجلس فائر ڈیپارٹمنٹ نے اطلاع دی تھی کہ 15 مزدور سرنگ کے اندر پھنس گئے ہیں، تاہم بعد ازاں یہ تعداد 27 ہو گئی۔ چار اضافی مزدوروں نے بھی اندر جا کر ریسکیو میں مدد دی، جس کے بعد مجموعی طور پر 31 افراد کو زندہ اور بغیر کسی ظاہری چوٹ کے نکالا گیا۔

https://x.com/MayorOfLA/status/1943165686400123185?ref_src=twsrc%5Etfw%7Ctwcamp%5Etweetembed%7Ctwterm%5E1943165686400123185%7Ctwgr%5E96b07cc246082c3b3275889305b3969393fc9d57%7Ctwcon%5Es1_&ref_url=https%3A%2F%2Fwww.upi.com%2FTop_News%2FUS%2F2025%2F07%2F10%2FLos-Angeles-tunnel-collapse%2F4391752127167%2F

سرنگ 18 فٹ قطر کی تھی اور اسے شہر کے ویسٹ واٹر مینجمنٹ سسٹم کے تحت تعمیر کیا جا رہا تھا۔ حادثہ داخلی راستے سے تقریباً پانچ سے چھ میل دور پیش آیا، جہاں مزدوروں نے تقریباً 15 فٹ ڈھیلی مٹی کے ڈھیر کو عبور کرتے ہوئے دوسرے کنارے پر موجود ساتھیوں تک رسائی حاصل کی۔

فائر ڈیپارٹمنٹ کے مطابق مزدوروں کو سرنگ میں موجود خصوصی گاڑی کے ذریعے مرحلہ وار باہر نکالا گیا۔

عبوری فائر چیف رونی ویلانویوا نے پریس کانفرنس میں کہا کہ آج رات ہم خوش قسمت رہے۔

میئر کیرن باس نے بھی موقع پر پہنچ کر حالات کا جائزہ لیا۔ انہوں نے کہا کہ یہ ایک بڑے سانحے کا اندیشہ تھا لیکن ہم نے ایک کامیاب ریسکیو آپریشن دیکھا۔ آج لاس اینجلس خوش نصیب رہا۔

یہ سرنگ تقریباً 630 ملین ڈالر کے ’کلیر واٹر پروجیکٹ‘ کا حصہ ہے، جس میں ماحولیاتی تحفظ کے لیے بنیادی ڈھانچے کی بہتری شامل ہے۔ اس منصوبے کو 2022 میں امریکی ماحولیاتی تحفظ ایجنسی سے 441 ملین ڈالر کی فنڈنگ ملی تھی۔