کابینہ ڈویژن نے سسکو ٹالوس کی سالانہ رپورٹ کی روشنی میں ایک جامع سائبر سیکیورٹی ایڈوائزری جاری کر دی ہے۔

ایڈوائزری میں ملک میں بڑھتے ہوئے سائبر حملوں پر شدید تشویش کا اظہار کرتے ہوئے شہریوں اور اداروں کو فوری احتیاطی اقدامات اختیار کرنے کی ہدایت کی گئی ہے۔

ایڈوائزری کے مطابق انسانی غفلت سائبر حملوں کی سب سے بڑی وجہ بن کر سامنے آئی ہے۔ کمزور یا بار بار استعمال ہونے والے پاس ورڈز، دوہری توثیق (Two-Factor Authentication) کے عدم استعمال، اور غیر محفوظ وی پی این سروسز کے ذریعے سسٹمز ہیک کیے جانے کے واقعات میں نمایاں اضافہ ہوا ہے۔

ایڈوائزری میں بتایا گیا ہے کہ ہیکرز نے چوری شدہ شناختی معلومات کے ذریعے عام شہریوں اور سرکاری اہلکاروں کے آن لائن اکاؤنٹس تک رسائی حاصل کی، جس سے حساس معلومات کے لیک ہونے کا خطرہ کئی گنا بڑھ گیا ہے۔

ای میل اٹیچمنٹس کو پاس ورڈ سے محفوظ بنائیں اور پاس ورڈ علیحدہ چینل سے بھیجیں، سرکاری معلومات واٹس ایپ یا ٹیلی گرام جیسے غیر محفوظ پلیٹ فارمز پر شیئر کرنے سے گریز کریں۔

سائبر سیکیورٹی ایڈوائزری کے مطابق حساس ڈیٹا کو کلاؤڈ اسٹوریج پر محفوظ کرنے سے حتی الامکان پرہیز کریں، صرف لائسنس یافتہ اور مستند سافٹ ویئر کا استعمال کریں، پبلک وائی فائی پر ای میل یا حساس نوعیت کی معلومات ہرگز شیئر نہ کریں اور اسپام فلٹرز جیسے گوگل یا یاہو پر مکمل انحصار نہ کریں، اپنی سیکیورٹی پالیسیز مضبوط بنائیں۔

کابینہ ڈویژن نے اداروں کو تنبیہ کی ہے کہ سائبر سیکیورٹی کو صرف IT کا مسئلہ نہ سمجھا جائے، بلکہ یہ ہر شہری اور ہر ادارے کی مشترکہ ذمہ داری ہے۔