اسپین میں تیار کردہ ایک نایاب قسم کے پنیر نے دنیا کا مہنگا ترین پنیر بننے کا اعزاز حاصل کر لیا، جب یہ 42,232 امریکی ڈالر (تقریباً 1 کروڑ 22 لاکھ پاکستانی روپے) میں نیلام ہوا۔

اس پنیر نے نہ صرف ایک عالمی مقابلہ جیتا بلکہ گنیز ورلڈ ریکارڈ میں بھی اپنا نام درج کروا لیا۔

یہ پنیر شمالی اسپین کے علاقے آسٹوریاس میں واقع آنخل دیاث ہیریرو پنیر فیکٹری نے تیار کیا، جسے ریگولیٹری کونسل DOP Cabrales کی جانب سے مقابلے میں بہترین پنیر قرار دیا گیا۔

بعد ازاں یہ لاگت کے اعتبار سے ایک منفرد نیلامی میں پیش کیا گیا جہاں ایل یاگر دے کولوٹو نامی ریستوران نے اسے خرید لیا۔

یہ خاص پنیر 5 پاؤنڈ (تقریباً 2.2 کلوگرام) وزنی تھا اور اسے گایوں کے دودھ سے تیار کیا گیا۔ اس کی خاص بات یہ تھی کہ اسے اسپین کی لاس ماسوس نامی غار میں 10 ماہ تک قدرتی ماحول میں پکایا گیا، جو سطح سمندر سے تقریباً 5,000 فٹ بلند ہے۔

اس منفرد اندازِ تیاری نے پنیر کو نہ صرف ذائقے میں بے مثال بنایا بلکہ خریداروں کے لیے ایک نایاب خزانے کی حیثیت اختیار کر لی۔

گنیز ورلڈ ریکارڈز نے اس پنیر کو نیلامی میں فروخت ہونے والا دنیا کا سب سے مہنگا پنیر قرار دیا ہے۔

ماہرین کا کہنا ہے کہ کیبرالیس پنیر اپنی تیز خوشبو، منفرد ذائقے اور روایتی اندازِ تیاری کی وجہ سے دنیا بھر میں پہچانا جاتا ہے، لیکن اس بار اس نے تاریخ رقم کر دی۔