بین ڈکٹ اور زیک کراؤلی کی زبردست اوپننگ شراکت کے باعث انگلینڈ نے چوتھے ٹیسٹ کے دوسرے دن کا اختتام 225 رنز دو کھلاڑی آؤٹ پر کیا۔

انگلینڈ کو بھارت کی برتری ختم کرنے کے لیے مزید 133 رنز کی ضرورت ہے۔

انگلینڈ کی اننگز کا آغاز جارحانہ انداز میں ہوا، جہاں بین ڈکٹ نے 94 رنز (100 گیندوں پر) اور زیک کراؤلی نے 84 رنز (113 گیندوں پر) اسکور کیے۔ دونوں نے مل کر 166 رنز کی اوپننگ شراکت قائم کی جو بھارتی بولنگ کے خلاف ایک زبردست جواب ثابت ہوئی۔

دن کے اختتام پر اولی پوپ 20 اور جو روٹ 11 رنز پر ناٹ آؤٹ تھے۔

اس سے قبل بھارت کی پہلی اننگز کا اختتام 358 رنز پر ہوا۔ بھارتی ٹیم نے دن کا آغاز 264 رنز چار کھلاڑی آؤٹ سے کیا، لیکن دوسرے دن جلد ہی رویندرا جڈیجا صرف ایک رن کا اضافہ کرکے جوفرا آرچر کی گیند پر ہیری بروک کے ہاتھوں کیچ آؤٹ ہو گئے۔

بھارت کے لیے سب سے جرأت مندانہ اننگز زخمی رشبھ پنت نے کھیلی، جو ایک دن قبل پاؤں پر چوٹ کی وجہ سے ریٹائرڈ ہرٹ ہو گئے تھے۔

آج وہ لنگڑاتے ہوئے میدان میں واپس آئے اور 75 گیندوں پر 54 رنز بنائے۔ ان کی اننگز کے دوران انہوں نے سخت تکلیف کے باوجود کئی شاندار شاٹس کھیلے، اور انہیں اولڈ ٹریفورڈ کے تماشائیوں نے کھڑے ہو کر داد دی۔

پنت کے علاوہ شاردُل ٹھاکر نے 41 اور واشنگٹن سندر نے 27 رنز بنائے۔ دونوں کے درمیان چھٹی وکٹ کے لیے 48 رنز کی شراکت ہوئی۔

انگلینڈ کے کپتان بین اسٹوکس نے شاندار بولنگ کرتے ہوئے 5 وکٹیں 72 رنز کے عوض حاصل کیں، جو ان کے کیریئر کا بہترین اسپیل ثابت ہوا۔