پاکستان کے معروف جیولن تھرو ایتھلیٹ ارشد ندیم نے انگلینڈ میں اپنی انجری کا باقاعدہ علاج شروع کر دیا ہے۔

ارشد ندیم حالیہ مہینوں میں مسلسل انجری مسائل کا شکار رہے ہیں، جس کے باعث ان کی عالمی ایونٹس میں شرکت متاثر ہو رہی تھی۔

پاکستان اسپورٹس بورڈ اور ایتھلیٹکس فیڈریشن کی مدد سے ارشد ندیم کو انگلینڈ روانہ کیا گیا جہاں وہ جدید میڈیکل سہولیات کے تحت اپنے کندھے اور کہنی کی انجری کا علاج کرا رہے ہیں۔

مزید پڑھیں: اولمپک گولڈ میڈلسٹ ارشد ندیم فوربز کی 30 انڈر 30 ایشیا فہرست میں شامل

ڈاکٹروں نے ابتدائی معائنے کے بعد مکمل ری ہیب پلان تجویز کیا ہے جس پر عمل شروع کر دیا گیا ہے۔

ذرائع کے مطابق ارشد ندیم کی حالت اب بہتر ہو رہی ہے، اور آئندہ چند ہفتوں میں ان کی فٹنس بحالی کی رپورٹ بھی جاری کی جائے گی۔ ارشد ندیم نے اپنی انجری کے باوجود گزشتہ برس کامن ویلتھ گیمز اور اسلامی یکجہتی گیمز میں گولڈ میڈلز حاصل کیے تھے۔

ارشد ندیم نے انگلینڈ سے اپنے پیغام میں پاکستانی عوام سے دعاؤں کی اپیل کرتے ہوئے کہا ہے کہ وہ جلد مکمل فٹ ہوکر دوبارہ میدان میں اترنے کا عزم رکھتے ہیں اور اگلے اولمپکس کو اپنا ہدف بنا چکے ہیں۔

مزید پڑھیں: قومی ہیرو ارشد ندیم کی خدمات فراموش، کوئی وزیر استقبال کے لیے نہ پہنچا  

ان کا کہنا تھا کہ ملک کے لیے مزید میڈلز جیتنے کا خواب اب بھی زندہ ہے۔

یاد رہے کہ ارشد ندیم کا شمار جنوبی ایشیا کے ٹاپ جیولن تھرو ایتھلیٹس میں ہوتا ہے اور وہ ٹوکیو اولمپکس میں پاکستان کی جانب سے نمایاں کارکردگی دکھانے والے پہلے ایتھلیٹ تھے۔