وفاقی دارالحکومت میں یومِ آزادی 2025 کی تیاریوں کے حوالے سے ایک اعلیٰ سطحی اجلاس منعقد ہوا، جس کی صدارت وفاقی وزیر منصوبہ بندی احسن اقبال نے کی۔

اجلاس میں وفاقی وزیر عطا تارڑ، رہنما مسلم لیگ (ن) طلال چوہدری، آئی ایس پی آر، صوبائی حکومتوں اور دیگر وفاقی اداروں کے نمائندگان نے شرکت کی۔

اجلاس میں فیصلہ کیا گیا کہ رواں برس 14 اگست کو معرکۂ حق کے عنوان سے ملک گیر تقریبات منعقد کی جائیں گی، جن کا مقصد پاکستان کے دفاعی، معاشی اور فکری پہلوؤں کو اجاگر کرنا ہے۔

وزارتوں اور اداروں کی جانب سے اجلاس میں یومِ آزادی کی تقریبات پر بریفنگ دی گئی، تمام صوبائی حکومتوں کو ہدایت کی گئی کہ وہ تقریبات کی سیکیورٹی اور نظم و ضبط کو یقینی بنائیں۔

ہائر ایجوکیشن کمیشن (HEC) کو ملک بھر کی یونیورسٹیوں میں تقریری، مضمون نویسی اور آرٹ مقابلوں کے انعقاد کی ہدایت کی گئی، سفارتی مشنز کو ہدایت دی گئی کہ وہ اوورسیز طلبہ اور پاکستانی برادریوں کو یومِ آزادی تقریبات میں فعال طور پر شامل کریں۔

وفاقی وزیر منصوبہ بندی احسن اقبال نے اجلاس سے خطاب کرتے ہوئے کہ، یومِ آزادی 2025 منفرد اور جوش و جذبے سے بھرپور انداز میں منایا جائے گا۔ ہم دنیا کو ایک ترقی یافتہ، پرامن اور خودمختار پاکستان کا پیغام دیں گے۔

انہوں نے حالیہ آپریشن بنیان المرصوص کو دفاعی خودمختاری کا مظہر قرار دیتے ہوئے کہا کہ جیسے ہمارا دفاع ناقابلِ تسخیر ہے، ویسے ہی ہمیں معاشی طور پر بھی ناقابلِ شکست بننے کا عزم کرنا ہوگا۔

احسن اقبال نے کہا کہ پاکستان کی ترقی عزم، ہمت اور تنظیم میں پوشیدہ ہے۔ ہر پاکستانی کو چاہیے کہ وہ ترقی کی اس “معرکۂ حق” میں اپنا فعال کردار ادا کرے۔

انہوں نے اوورسیز پاکستانیوں پر زور دیا کہ وہ دنیا بھر میں پاکستان کا مثبت امیج اجاگر کرنے میں اپنا حصہ ڈالیں۔