کراچی: نئے مالی سال کے آغاز کے ساتھ ہی آج پاکستان اسٹاک مارکیٹ میں زبردست تیزی کا رجحان ہے، اور مارکیٹ نے نئی تاریخ رقم کر دی ہے،جس کے تحت 100 انڈیکس پہلی بار 1 لاکھ 28 ہزار کی سطح عبور کرگیا۔

کاروباری ہفتے کے دوسرے روز پاکستان اسٹاک مارکیٹ میں زبردست تیزی دیکھی جارہی ہے، اور مارکیٹ میں ٹریڈنگ کےدوران 100 انڈیکس میں  2471 پوائنٹس کا بڑا اضافہ ہوا ہے، جس کے بعد 100 انڈیکس پہلی بار 1 لاکھ 28 ہزار کی سطح عبور کرگیا۔

مارکیٹ اس وقت 100 انڈیکس 1 لاکھ 28 ہزار 149 پوائنٹس پر ٹریڈ کررہا ہے۔

یہ بھی پڑھیں: حکومت کا بڑا معاشی دعویٰ، کیا ترسیلات زر 39 ارب ڈالر سے بھی تجاوز کریں گی؟

تجزیہ کاروں کے مطابق اسٹاک مارکیٹ میں تیزی کی یہ لہر چین کی جانب سے 3.4 ارب ڈالر کے قرض کی رول اوور منظوری، آئی ایم ایف کی شرائط کے مطابق زرمبادلہ کے ذخائر کا 14 ارب ڈالر سے تجاوز کرنا، اور امریکہ کے ساتھ ممکنہ تجارتی معاہدوں جیسے مثبت عوامل کا نتیجہ ہے۔

یاد رہے کہ گزشتہ روز (پیر کو) بھی کاروباری ہفتے کے پہلے دن پاکستان اسٹاک ایکسچینج میں نمایاں تیزی دیکھی گئی تھی، اور ملکی تاریخ میں پہلی مرتبہ انڈیکس 1,25,000 پوائنٹس کی سطح عبور کر گیا تھا۔

ماہرین کا کہنا ہے کہ اگر معاشی اور سیاسی استحکام برقرار رہا تو اسٹاک مارکیٹ آئندہ دنوں میں مزید بلندیوں کو چھو سکتی ہے۔