سپریم کورٹ آف پاکستان نے ڈیجیٹل اصلاحات کے ایک اہم قدم کے طور پر ملک بھر کی تمام رجسٹریز میں ای فائلنگ سسٹم نافذ کر دیا ہے۔

اس سسٹم کے تحت اب پٹیشنز، میموز، فیصلے اور آرڈرز آن لائن دستیاب ہوں گے، جس سے کیسز کی کارروائی میں مزید سہولت حاصل ہو گی۔

سپریم کورٹ کی پرنسپل سیٹ اور دیگر رجسٹریز جیسے اسلام آباد، لاہور، پشاور، کراچی اور کوئٹہ میں ای فائلنگ سسٹم فعال کر دیا گیا ہے، جس سے نہ صرف وکلا، بلکہ سائلین کو بھی قانونی کارروائیوں میں آسانی ملے گی۔

 اس سسٹم کے تحت کیس مینجمنٹ سسٹم کے ذریعے سائلین کو ای میلز کے ذریعے مطلع کیا جائے گا۔

ای فائلنگ سسٹم سے کاغذ کے استعمال میں کمی آئے گی، جس کے نتیجے میں وقت اور اخراجات میں نمایاں کمی ہوگی۔ یہ اقدام عدالتوں میں کیسز کی تیز رفتار تکمیل اور وکلا کے لیے بہتر سہولت فراہم کرے گا۔

سپریم کورٹ نے وکلا کے لیے رجسٹریشن کو لازمی قرار دے دیا ہے اور اس حوالے سے بار کونسلز سے وکلا کے موبائل نمبر اور ای میل کی تفصیلات طلب کی گئی ہیں تاکہ سسٹم کے تحت موثر رابطہ قائم کیا جا سکے۔

ای فائلنگ سسٹم کی کامیاب عمل داری کے لیے سپریم کورٹ نے سرکاری محکموں کو بھی ہدایت دی ہے کہ وہ ای فائلنگ میں معاونت کے لیے فوکل پرسنز مقرر کریں۔

مزید برآں اس سسٹم سے متعلق عوام میں آگاہی پیدا کرنے کے لیے رابطہ نمبر بھی جاری کیا گیا ہے تاکہ سائلین اور وکلا کو کسی بھی قسم کی مشکلات کا سامنا نہ ہو۔

یہ ڈیجیٹل اصلاحات سپریم کورٹ کی جدیدیت کی جانب ایک اور اہم قدم ہے جو عدالتی نظام میں شفافیت اور تیزی لانے میں معاون ثابت ہوگا۔

اس کے علاوہ، سائلین اور وکلا دونوں کے لیے قانونی خدمات کو مزید بہتر، مؤثر اور قابل رسائی بنایا جائے گا۔