بھارتی ریاست گجرات میں آج صبح ایک لرزہ خیز سانحہ پیش آیا جب گمبھیرا کے علاقے میں واقع ایک 40 سالہ قدیم پل کا ایک حصہ اچانک زمین بوس ہو گیا۔

جس کے نتیجے میں پل پر موجود متعدد گاڑیاں دریا میں جا گریں اور کم از کم 10 افراد جان کی بازی ہار گئے۔

عینی شاہدین کے مطابق حادثہ اس وقت پیش آیا جب پل پر ٹریفک معمول کے مطابق جاری تھی۔ اچانک پل کا ایک بڑا حصہ زور دار آواز کے ساتھ نیچے آ گرا، اور پل پر موجود موٹر گاڑیاں، موٹر سائیکلیں اور راہگیر لمحوں میں دریا کے بے رحم پانیوں میں غرق ہو گئے۔

واقعے کے فوراً بعد امدادی ٹیمیں جائے حادثہ پر پہنچ گئیں۔ ریسکیو اہلکاروں نے اب تک 3 افراد کو زندہ بچا لیا ہے جبکہ باقی لاپتا افراد کی تلاش جاری ہے۔

دریا کی گہرائی اور تیز بہاؤ کی وجہ سے ریسکیو آپریشن میں شدید مشکلات کا سامنا ہے۔

مقامی رہائشیوں کا کہنا ہے کہ پل کی خستہ حالی ایک عرصے سے واضح تھی اور متعدد بار متعلقہ حکام کو اس کی مرمت کی درخواستیں دی گئی تھیں، مگر کوئی کارروائی نہ کی گئی۔

ایک شہری نے غم و غصے کا اظہار کرتے ہوئے کہا لپ ہم نے کئی بار بتایا کہ پل خطرناک ہے، مگر کسی نے ہماری فریاد نہ سنی۔ آج قیمت انسانی جانوں کی صورت میں ادا کرنی پڑی۔

وزیر اعلیٰ گجرات بھوپیندر پٹیل نے واقعے کا سخت نوٹس لیتے ہوئے محکمہ روڈ اینڈ بلڈنگ کو فوری تحقیقات کا حکم دے دیا ہے۔

ابتدائی اطلاعات کے مطابق پل کی مرمت یا مضبوطی کے حوالے سے کوئی خاطر خواہ اقدامات نہیں کیے گئے تھے، جو حادثے کی ممکنہ وجہ بنے۔