وفاقی دارالحکومت اسلام آباد کے علاقے مرگلہ ایونیو پر حال ہی میں نصب کیے گئے دو ہاتھوں اور گیندوں پر مشتمل عجیب و غریب مجسمے کو سوشل میڈیا پر تنقید کے بعد ہٹانے کا فیصلہ کر لیا گیا ہے۔ مذکورہ مجسمے کو عارضی طور پر کپڑے سے ڈھانپ دیا گیا ہے۔

یہ یادگار، جو کہ حالیہ دنوں میں عوام کی توجہ کا مرکز بنی، سوشل میڈیا صارفین کی جانب سے غیرواضح، غیر متعلقہ اور غیر موزوں قرار دی گئی۔

 متعدد افراد نے مجسمے کے ڈیزائن اور تناظر پر سوالات اٹھائے جس کے بعد معاملہ انتظامیہ کی توجہ میں آیا۔

معروف صحافی نادیہ مرزا کے مطابق، یہ مجسمہ سی ڈی اے (کپیٹل ڈیولپمنٹ اتھارٹی) کی جانب سے نصب نہیں کیا گیا تھا بلکہ فیصل ہلز ہاؤسنگ پراجیکٹ کی جانب سے نصب کیا گیا تھا۔

صحافی کے مطابق موقع پر موجود ایک شخص نے بتایا کہ اب سی ڈی اے نے باقاعدہ طور پر اجازت منسوخ کرتے ہوئے مجسمہ ہٹانے کی ہدایت جاری کر دی ہے۔

ذرائع کا کہنا ہے کہ یہ تنصیب کسی قسم کے سرکاری یا ثقافتی پس منظر سے مطابقت نہیں رکھتی تھی، اور شہریوں کی جانب سے متعدد شکایات موصول ہونے کے بعد انتظامیہ نے کارروائی کا فیصلہ کیا۔

سی ڈی اے حکام کی جانب سے باضابطہ بیان کا انتظار ہے، تاہم فی الوقت مجسمہ ڈھانپ دیا گیا ہے اور آئندہ چند روز میں اسے مکمل طور پر ہٹائے جانے کا امکان ہے۔