کراچی: گورنر سندھ کامران خان ٹیسوری کی زیر صدارت گورنر ہاؤس میں ربیع الاول کے سلسلے میں مختلف مکاتبِ فکر سے تعلق رکھنے والے جید علمائے کرام کا اہم اجلاس منعقد ہوا۔

اجلاس میں جشن ولادتِ رسول ﷺ کے انتظامات، محافل میلاد اور جلوسوں کے پُرامن انعقاد سے متعلق تفصیلی مشاورت کی گئی۔

اجلاس میں رویت ہلال کمیٹی کے چیئرمین مولانا عبدالخبیر آزاد، مولانا بشیر فاروق، مفتی نعمان نعیمی، مولانا شفیع اکاڑوی، ڈاکٹر صدیق راھٹور، مولانا اکبر درس، مولانا حبیب عطاری سمیت دیگر ممتاز علما شریک ہوئے۔

گورنر سندھ نے اجلاس کے بعد میڈیا سے گفتگو کرتے ہوئے کہا کہ اللہ تعالیٰ نے مجھے بابرکت روز 12 ربیع الاول کو گورنر سندھ کے منصب پر فائز کیا، اور اسی نسبت سے میں ہر سال اس مقدس مہینے کو بھرپور انداز میں منانے کا عزم رکھتا ہوں۔

کامران خان ٹیسوری نے اعلان کیا کہ یکم تا 12 ربیع الاول روزانہ گورنر ہاؤس میں محافل کا انعقاد کیا جائے گا، جن کے تمام اخراجات وہ ذاتی حیثیت میں برداشت کریں گے۔

گورنر سندھ نے مزید بتایا کہ ربیع الاول کے موقع پر 1500 ویں جشن ولادت کے طور پر یادگاری ٹکٹ اور سکہ جاری کرنے کی تجویز بھی دی گئی ہے، جس کے لیے وہ وزیراعظم پاکستان اور گورنر اسٹیٹ بینک کو خط لکھیں گے۔

اجلاس کے دوران علمائے کرام نے بھی اپنے مکمل تعاون کا یقین دلایا اور شہر بھر میں مذہبی رواداری، فرقہ وارانہ ہم آہنگی اور پُرامن فضا برقرار رکھنے پر زور دیا۔