نیشنل ڈیزاسٹر مینجمنٹ اتھارٹی (این ڈی ایم اے) خیبر پختونخوا نے گزشتہ 48 گھنٹوں کے دوران بارشوں اور سیلاب سے ہونے والے جانی و مالی نقصان کی تفصیلات جاری کر دیں۔

نیشنل ڈیزاسٹر مینجمنٹ اتھارٹی (این ڈی ایم اے) کے ترجمان کا بتانا ہے کہ  بارشوں، سیلاب، لینڈسلائیڈنگ اور آسمانی بجلی گرنے سے خیبر پختونخوا  میں 321 افراد جاں بحق اور 28 افراد زخمی ہوئے۔

 ترجمان نے بتایا کہ شمالی علاقہ جات میں ممکنہ بارشوں کی صورت میں لینڈ سلائیڈنگ کے واقعات میں مزید اضافے کا امکان ہے، عوام بارشوں اور سیلاب کے دوران محتاط رہیں اور حفاظتی اقدامات یقینی بنائیں، سیاح اگلے 5 تا6 روز تک شمالی علاقہ جات کا سفر کرنے سے گریز کریں۔

قدرتی آفت سے سب سے زیادہ تباہی ضلع بونیر میں ہوئی جہاں 213 افراد لقمہ اجل بنے جبکہ درجنوں لاپتا ہیں۔ مانسہرہ میں سیلابی ریلے اور تودے گرنے کے واقعات میں 20 افراد جان سے گئے، باجوڑ میں کلاؤڈ برسٹ کے بعد سیلاب اور لینڈ سلائیڈنگ سے مزید 21 افراد جاں بحق ہوگئے۔

Advertisement

Rain & cloud bursts causes havoc in KPK, GB & AJK as atleast 230 people dead & many missing since last night due to floods & landslides. Buner, bajaur, mansehra, battagram are hit badly. Pray for the safety of people & avoid travelling in this weather.
pic.twitter.com/BPS0zpphlx

— (@TheAngrrybird) August 15, 2025

سیلابی ریلوں نے کئی گاؤں بہا دیے، گھروں کی چھتیں گر گئیں، مال مویشی اور گاڑیاں بھی پانی میں بہہ گئیں۔ بونیر میں ہنگامی حالت نافذ کردی گئی ہے۔ سوات میں بپھرے دریا نے راستے میں آنے والی ہر چیز کو بہا ڈالا، مینگورہ ندی کا پانی گھروں میں داخل ہوگیا اور رابطہ پلوں کو شدید نقصان پہنچا۔

Advertisement

Floods wreak havoc in KPK and Azad and Jammu Kashmir in Pakistan.

International community is humbly requested to help out the flood affected people. pic.twitter.com/LxfkIHXCw6

— Israr Ahmed Rajpoot (@ia_rajpoot) August 15, 2025

آزاد کشمیر کی وادی نیلم میں چھ رابطہ پل سیلابی ریلے کی نذر ہوگئے، مختلف حادثات میں 11 افراد جاں بحق جبکہ مظفرآباد میں کلاؤڈ برسٹ سے ایک ہی خاندان کے 6 افراد سمیت 8 افراد ہلاک ہوئے۔

گلگت بلتستان میں بھی صورتحال سنگین رہی، اسکردو میں 5 پل بہہ گئے جبکہ چلاس کے اوچھار نالے میں کئی افراد لاپتا ہوگئے۔

باجوڑ میں امدادی ہیلی کاپٹر حادثے کا شکار

جمعہ کو باجوڑ میں سیلاب متاثرہ علاقوں میں امدادی سرگرمیوں کے لیے جانے والا خیبر پختونخوا حکومت کا ہیلی کاپٹر مہمند کے قریب گر کر تباہ ہوگیا، حادثے میں 2 پائلٹس سمیت عملے کے 5 افراد شہید ہوگئے۔

ابتدائی رپورٹ کے مطابق حادثہ خراب موسم اور شدید دھند کے باعث پیش آیا۔ شہداء کے ڈی این اے سیمپل لاہور بھیج دیے گئے ہیں جبکہ ان کی نماز جنازہ آج ادا کی جائے گی۔ صوبائی حکومت نے آج صوبے بھر میں سوگ کا اعلان کیا ہے۔

سوگ کا اعلان

خیبرپختونخوا حکومت نے جانی نقصان پرکل صوبے بھر میں سوگ منانے کا اعلان کیا ہے۔ وزیر اعلیٰ کے مطابق کل صوبے میں قومی پرچم سرنگوں رہے گا۔

پاک فوج کا فلڈ ریلیف آپریشن

پاک فوج کا سوات اور باجوڑ کے سیلاب سے متاثرہ علاقوں میں ریلیف آپریشن جاری ہے اور پاک فوج کی ٹیمیں متاثرہ اضلاع میں امدادی سرگرمیوں میں مصروف ہیں۔

مزید بارشوں کی پیش گوئی

نیشنل ڈیزاسٹر منیجمنٹ اتھارٹی (این ڈی ایم اے) نے سیلاب سے متاثرہ علاقوں میں مزید بارشوں کی وارننگ جاری کردی ہے۔ 18 سے 22 اگست تک خیبر پختونخوا کے مختلف اضلاع بشمول چترال، دیر، سوات، بونیر، مانسہرہ، نوشہرہ اور وزیرستان میں معتدل سے تیز بارشوں کا امکان ہے۔

اسی طرح گلگت بلتستان اور آزاد کشمیر کے استور، اسکردو، ہنزہ، شگر، وادی نیلم اور مظفرآباد میں بھی بارش کی پیش گوئی کی گئی ہے۔

قدرتی آفت سے متاثرہ علاقوں میں ریسکیو اور امدادی سرگرمیاں جاری ہیں تاہم خراب موسم اور تباہ شدہ رابطہ پلوں کے باعث مشکلات درپیش ہیں۔