نیشنل ڈیزاسٹر مینجمنٹ اتھارٹی (این ڈی ایم اے) نے 23 تا 30 اگست تک ملک کے مختلف علاقوں میں شدید بارشوں اور ممکنہ سیلابی صورتحال پر الرٹ جاری کر دیا ہے۔

این ڈی ایم اے کی جانب سے جاری اعلامیے میں کہا گیا ہے کہ پاکستان میں تین موسمی سلسلے داخل ہو رہے ہیں جو ملک کے بیشتر علاقوں میں تباہ کن بارشوں کا باعث بنیں گے۔

این ڈی ایم اے کے مطابق، 23 تا 25 اگست کے دوران اسلام آباد، خیبر پختونخواہ، کشمیر اور پنجاب میں آندھی اور تیز ہواؤں کے ساتھ شدید بارشوں کی توقع ہے۔

اس دوران پنجاب کے شمال مشرقی اضلاع جیسے راولپنڈی، اٹک، جہلم، خوشاب اور سیالکوٹ میں شدید بارشیں متوقع ہیں جس سے سیلابی صورتحال پیدا ہو سکتی ہے۔ لاہور، فیصل آباد، ملتان اور دیگر شہر بھی متاثر ہو سکتے ہیں۔

خیبرپختونخواہ کے پہاڑی علاقوں میں لینڈ سلائیڈنگ اور ندی نالوں میں طغیانی کا شدید خطرہ ہے۔ چترال، سوات، مانسہرہ اور دیگر علاقوں میں شدید بارشوں کے باعث زمین میں دھنساؤ اور سڑکوں کا متاثر ہونا متوقع ہے۔

سندھ کے ساحلی علاقوں بشمول کراچی اور ٹھٹہ میں 27 تا 30 اگست کے درمیان موسلا دھار بارشوں کا امکان ہے۔ بلوچستان کے مختلف اضلاع میں بھی طوفانی ہوائیں اور موسلادھار بارشیں متوقع ہیں۔

دریاوں میں پانی کی سطح میں اضافے کے باعث سندھ میں تونسہ اور گڈو کے مقام پر پانی کا بہاؤ پانچ لاکھ کیوسک تک پہنچنے کا امکان ہے۔ دریائے راوی اور چناب کے ملحقہ علاقوں میں بھی بارشوں کے باعث پانی کا بہاؤ بڑھ سکتا ہے۔

این ڈی ایم اے نے تمام شہریوں کو ہدایت کی ہے کہ وہ بارشوں اور سیلاب کے دوران محتاط رہیں اور ضروری حفاظتی تدابیر اختیار کریں۔ سیاحوں کو شمالی علاقہ جات کا سفر کرنے سے گریز کرنے کی درخواست کی گئی ہے۔

مزید یہ کہ تمام متعلقہ ادارے ایمرجنسی صورتحال کے لئے تیار ہیں اور امدادی کاروائیاں جاری رکھے ہوئے ہیں۔

این ڈی ایم اے نے شہریوں سے اپیل کی ہے کہ وہ کسی بھی ایمرجنسی کی صورت میں مقامی انتظامیہ اور ریسکیو حکام سے فوراً رابطہ کریں۔