امریکی صدر ڈونلڈ ٹرمپ نے ٹیکنالوجی کی دنیا میں زلزلہ برپا کر دیا جمعرات کو اپنے سوشل میڈیا پلیٹ فارم ٹروتھ سوشل پر ایک دھماکہ خیز بیان میں انہوں نے انٹیل (Intel) کے سی ای او لپ-بو تان (Lip-Bu Tan) سے فوری استعفیٰ کا مطالبہ کر دیا۔

ٹرمپ نے اپنی پوسٹ میں لکھا کہ انٹیل کا سی ای او شدید تضادات کا شکار ہے، اور اُسے فوری طور پر استعفیٰ دینا چاہیے۔ اس مسئلے کا اور کوئی حل نہیں شکریہ!

امریکی میڈیا کے مطابق یہ مطالبہ ایسے وقت میں سامنے آیا ہے جب حالیہ دنوں میں ریپبلکن سینیٹر ٹام کاٹن نے لپ-بو تان کے مبینہ چینی روابط پر شدید تحفظات کا اظہار کیا ہے۔

ان کا کہنا ہے کہ تان نے چین میں ایسی کمپنیوں میں سرمایہ کاری کی ہے جن کے تعلقات چینی فوج سے ہیں اور یہ امریکی قومی سلامتی کے لیے سنگین خطرہ بن سکتے ہیں۔

سینیٹر کاٹن نے انٹیل بورڈ چیئر فرینک یئری کو خط لکھ کر وضاحت طلب کی ہے اور کہا کہ جو کمپنیاں امریکی حکومت سے اربوں ڈالر کی سبسڈی لیتی ہیں، انہیں قومی سلامتی کے اصولوں کی مکمل پاسداری کرنی چاہیے۔

غیر ملکی خبر رساں ادارے کی رپورٹ کے مطابق، تان نے ذاتی حیثیت اور اپنے وینچر فنڈز کے ذریعے چین کی درجنوں کمپنیوں میں سرمایہ لگایا ہے، جن میں سے بعض پر چینی حکومت اور فوج سے روابط کے الزامات ہیں۔

ابھی تک انٹیل اور لپ-بو تان نے اس معاملے پر کوئی ردعمل نہیں دیا۔