پاکستان کے محمد عامر اور عماد وسیم نے دی ہنڈریڈ 2025 سیزن کے لیے ناردرن سپرچارجرز کے ساتھ معاہدہ کر لیا ہے۔

دونوں کھلاڑیوں کو ٹیم میں بطور ریپلیسمنٹ شامل کیا گیا ہے، جس کے بعد پاکستانی کھلاڑیوں کے ٹورنامنٹ سے باہر کیے جانے کے خدشات وقتی طور پر ختم ہو گئے ہیں۔

یہ پیشرفت اس وقت سامنے آئی ہے جب رواں سال کے آغاز میں دی ہنڈریڈ کے ڈرافٹ میں کسی بھی پاکستانی مرد کھلاڑی کو منتخب نہیں کیا گیا تھا۔

مزید پڑھیں: 128 سال بعد کرکٹ کی واپسی؛ آئی سی سی کا ایل اے اولمپکس 2028 کے لیے شیڈول کا اعلان

اس صورتحال نے شائقین کرکٹ اور مبصرین میں یہ تاثر پیدا کیا کہ ٹورنامنٹ کے نئے بھارتی سرمایہ کاروں کے اثرات کی وجہ سے پاکستانی کھلاڑیوں کو جان بوجھ کر نظر انداز کیا جا رہا ہے۔ تاہم انگلینڈ اینڈ ویلز کرکٹ بورڈ (ECB) نے ان خدشات کی تردید کی تھی۔

محمد عامر کو بین ڈوارشویس (مکمل سیزن) اور عماد وسیم کو مچل سینٹنر (دو میچز) کے متبادل کے طور پر سائن کیا گیا ہے۔

واضح رہے کہ ناردرن سپرچارجرز کی ملکیت بھارتی میڈیا گروپ Sun Group کے پاس جا رہی ہے، جو یکم اکتوبر سے ٹیم کا کنٹرول سنبھالے گی۔

دوسری جانب، انگلینڈ کے اسٹار آل راؤنڈر بین اسٹوکس بھی سپرچارجرز کے ساتھ بطور مینٹور شامل ہوں گے۔ اسٹوکس کندھے کی انجری کے باعث میدان سے باہر ہیں لیکن وہ ٹیم کے ساتھ جڑ کر اینڈریو فلنٹوف اور ہیری بروک کی معاونت کریں گے۔