کراچی میں ہونے والی شدید بارشوں اور طوفانی موسمی حالات کے سبب موبائل سروس اور انٹرنیٹ سروس میں خلل آیا ہے، جس سے صارفین کو شدید مشکلات کا سامنا کرنا پڑ رہا ہے۔

آدھے شہر کی بجلی بند ہونے اور موبائل ٹاورز کے متاثر ہونے کے باعث شہریوں کو موبائل اور انٹرنیٹ کے ذریعے رابطہ کرنے میں مشکلات پیش آ رہی ہیں۔

کراچی کے مختلف علاقوں میں بجلی کی طویل بندش نے موبائل ٹاورز کو بھی متاثر کیا، جس کے نتیجے میں موبائل سروس میں خلل آیا ہے۔

کئی گھنٹوں کی بندش سے متعدد موبائل ٹاورز کے جنریٹرز میں فیول ختم ہوگیا، جس کی وجہ سے موبائل سروس بند ہوگئی۔

سڑکوں پر کئی فٹ پانی کھڑا ہونے کی وجہ سے ڈیزل کی فراہمی میں مشکلات پیش آئیں۔ ٹاورز تک ڈیزل کی ترسیل میں رکاوٹ پیدا ہوئی، جس سے جنریٹرز کا کام متاثر ہوگیا اور موبائل سروس مزید متاثر ہوئی۔

موبائل سروس کے متاثر ہونے کی وجہ سے شہر کے مختلف حصوں میں پھنسے شہریوں کو اپنے اہل خانہ سے رابطہ کرنے میں شدید مشکلات کا سامنا کرنا پڑا۔

ٹریفک جام میں پھنسے ہوئے افراد موبائل سروس کے نہ ہونے کی وجہ سے مدد کے لیے اپنے پیاروں تک پہنچنے میں ناکام رہے۔

شہر کی موبائل انٹرنیٹ سروس بھی متاثر ہوئی جس کے نتیجے میں آن لائن 2 وہیلر اور 4 وہیلر رائڈرز کی سروسز سے رابطہ ممکن نہ رہا۔ بارشوں اور سروس میں خلل کے باعث شہریوں کو روزمرہ کے کاموں میں دقت پیش آئی۔

محکمہ موسمیات کے مطابق، کراچی میں مزید بارشوں کا امکان ہے، جس کی وجہ سے موبائل سروس میں مزید مشکلات کا سامنا ہو سکتا ہے۔

 شہریوں کو احتیاطی تدابیر اختیار کرنے اور اپنی ضروریات کے لیے متبادل ذرائع استعمال کرنے کی ہدایت کی گئی ہے۔