وزیراعظم شہباز شریف نے سماجی رابطے کی ویب سائٹ ایکس پر جاری بیان میں آذربائیجان اور آرمینیا کے درمیان امریکی صدر کی سرپرستی میں ہونے والے تاریخی امن معاہدے کا خیرمقدم کیا۔

انہوں نے کہا کہ یہ جنوبی قفقاز میں امن، استحکام اور تعاون کے نئے دور کا آغاز ہے۔

وزیراعظم کے مطابق یہ خطہ کئی دہائیوں سے تنازعات اور انسانی مصائب کا شکار رہا ہے۔

Pakistan welcomes the historic peace agreement signed between the Republic of Azerbaijan and the Republic of Armenia at the White House Summit under the auspices of U.S. President Donald J. Trump @realDonaldTrump

Advertisement

This landmark development marks the dawn of a new era of peace,…

— Shehbaz Sharif (@CMShehbaz) August 9, 2025

وزیراعظم نے آذربائیجان کے صدر الہام علیوف اور عوام کو اس تاریخی کامیابی پر مبارکباد دی اور کہا کہ یہ معاہدہ مستقبل کے پرامن راستے کا عکاس ہے۔

بیان میں کہا گیا کہ پاکستان ہمیشہ برادر ملک آذربائیجان کے ساتھ کھڑا رہا ہے اور اس موقع پر بھی ان کے ساتھ ہے۔

پاکستان نے امریکا اور صدر ٹرمپ کے مصالحتی کردار کو بھی سراہا، جس کے نتیجے میں یہ معاہدہ طے پایا اور خطے میں تجارت، رابطوں اور انضمام کے نئے امکانات کھلے۔ وزیراعظم نے امید ظاہر کی کہ یہ مذاکراتی جذبہ دیگر تنازعات زدہ خطوں کے لیے بھی مثال بنے گا۔

واضح رہے کہ امریکی صدر ڈونلڈ ٹرمپ کی ثالثی سے آذربائیجان اور آرمینیا کے درمیان مکمل جنگ بندی اور امن معاہدہ طے پا گیا۔ امریکی دارالحکومت میں ہونے والی اس تقریب میں آذربائیجان کے صدر اور آرمینیا کے وزیراعظم نے معاہدے پر دستخط کیے۔

اس موقع پر صدر ٹرمپ نے کہا کہ دونوں ممالک نے جنگ کے بجائے تجارت اور اقتصادی تعاون کو ترجیح دینے کا فیصلہ کیا ہے۔ امریکا آذربائیجان اور آرمینیا کے ساتھ توانائی، تجارت اور ٹیکنالوجی کے شعبوں میں الگ الگ دو طرفہ معاہدے کرے گا، جن میں مصنوعی ذہانت کے منصوبے بھی شامل ہوں گے۔

مزید پڑھیں: پاکستان مشرق وسطیٰ میں امن کیلیے کرداراداکرسکتاہے،شہباز شریف کامارکوروبیوکوواضح پیغام

انہوں نے انکشاف کیا کہ آرمینیا اور آذربائیجان کے رہنماؤں نے انہیں امن نوبل انعام کے لیے نامزد کرنے کی تجویز دی ہے۔

صدر آذربائیجان نے معاہدے کے بعد کہا کہ آج تاریخی دن ہے اور خطے کے عوام ٹرمپ کے کردار کو یاد رکھیں گے۔ وزیراعظم آرمینیا نے بھی کہا کہ یہ دن محفوظ اور پُرامن مستقبل کی بنیاد ہے۔

صدر ٹرمپ نے ایک بار پھر پاکستان اور بھارت کی جنگ بندی کرانے کا تذکرہ کرتے ہوئے کہا کہ دونوں ممالک بڑی جنگ کی طرف جا رہے تھے، مگر انہیں سمجھایا کہ لڑائی نہیں، تجارت کریں۔ ان کا کہنا تھا کہ صدارت سنبھالتے وقت دنیا میں آگ لگی ہوئی تھی، مگر وہ جنگ کے بجائے امن اور خوشحالی کے خواہاں ہیں۔

اس موقع پر صدر آذربائیجان اور وزیراعظم آرمینیا نے عزم ظاہر کیا کہ دونوں ممالک ذمہ داری کے ساتھ آگے بڑھیں گے اور آئندہ نسلوں کو پُرامن مستقبل دینے کی کوشش کریں گے۔