پاکستان نے غزہ کے مظلوم عوام کے لیے انسانی ہمدردی کے تحت امدادی اشیا کی 18ویں کھیپ روانہ کر دی ہے۔

دفتر خارجہ کے ترجمان شفقت علی خان نے جمعرات کو ہفتہ وار میڈیا بریفنگ کے دوران بتایا کہ یہ امدادی کھیپ وزیراعظم شہباز شریف کی خصوصی ہدایت پر روانہ کی گئی، جس میں خشک راشن، تیار کھانا، ادویات اور دیگر ضروری اشیائے خور و نوش شامل ہیں۔

امدادی سامان نیشنل ڈیزاسٹر مینجمنٹ اتھارٹی (این ڈی ایم اے) نے متعلقہ اداروں کے تعاون سے تیار کیا، جبکہ روانگی کے موقع پر وفاقی وزیر اطلاعات عطا اللہ تارڑ بھی موجود تھے۔

ترجمان نے بتایا کہ پاکستان اب تک مجموعی طور پر ایک ہزار 815 ٹن امدادی اشیا غزہ روانہ کر چکا ہے۔

دفتر خارجہ کے ترجمان کا کہنا تھا کہ غزہ کے عوام کے ساتھ پاکستان کی مسلسل اور عملی حمایت ہماری پُرعزم یکجہتی کی مظہر ہے۔ پاکستان آزاد، خودمختار اور پائیدار فلسطینی ریاست کے قیام کی حمایت پر ہمیشہ سے کاربند ہے۔

ہفتہ وار بریفنگ کے دوران ترجمان دفتر خارجہ نے ایرانی صدر کے حالیہ دورہ پاکستان کو نہایت اہم قرار دیا۔ انہوں نے بتایا کہ ایرانی صدر نے وزیراعظم شہباز شریف کی دعوت پر پاکستان کا دورہ کیا، جس دوران انہوں نے صدر پاکستان اور وزیراعظم سمیت اعلیٰ قیادت سے ملاقاتیں کیں۔

ترجمان کے مطابق ایرانی صدر نے اسرائیلی جارحیت کی شدید مذمت کی اور فلسطینی عوام کی حمایت میں پاکستان کے مؤقف کو سراہا۔ فریقین نے دوطرفہ تعاون خصوصاً تجارت کے شعبے میں پیش رفت پر اتفاق کیا، جبکہ تجارتی حجم میں اضافے پر بھی زور دیا گیا۔

ترجمان نے 5 اگست کو منائے گئے یومِ استحصالِ کشمیر کا ذکر کرتے ہوئے کہا کہ یہ دن کشمیری عوام کے حقِ خودارادیت کی جدوجہد کو خراجِ تحسین پیش کرنے کے لیے منایا گیا۔

ترجمان نے ایک بار پھر واضح کیا کہ پاکستان مسئلہ کشمیر کا حل اقوام متحدہ کی سلامتی کونسل کی قراردادوں کے مطابق چاہتا ہے۔

ترجمان نے اسرائیلی حکام کی جانب سے مسجد اقصیٰ کی بے حرمتی کی شدید مذمت کرتے ہوئے اسے عالمی قوانین اور بین الاقوامی ضمیر کے منافی قرار دیا۔ ساتھ ہی انہوں نے کہا کہ پاکستان یوکرین تنازع کے پرامن اور مذاکرات پر مبنی حل کی حمایت کرتا ہے۔