بنکاک: معروف باڈی بلڈر اعجاز احمد نے 57ویں ایشین گیمز میں ماسٹر کلاس کیٹیگری (80 کلوگرام سے اوپر) میں گولڈ میڈل جیت لیا۔

تفصیلات کے مطابق خیبرپختونخوا کے معروف باڈی بلڈر اور پولیس اہلکار اعجاز احمد نے 57ویں ایشین گیمز میں شاندار کارکردگی کا مظاہرہ کرتے ہوئے ماسٹر کلاس کیٹیگری (80 کلوگرام سے اوپر) میں گولڈ میڈل جیت لیا۔

تھائی لینڈ میں ہونے والی اس چیمپئن شپ میں یہ پاکستان کا دوسرا گولڈ میڈل ہے، جس نے ملک بھر کے شائقین کھیلوں کو مسرت اور فخر سے ہمکنار کیا۔

مزید پڑھیں: پاکستان نے ساؤتھ ایشین باڈی بلڈنگ چیمپئن شپ میں برانز میڈل جیت لیا

پولیس فورس سے وابستہ 53 سالہ اعجاز احمد کئی دہائیوں سے باڈی بلڈنگ کے کھیل میں پاکستان کی نمائندگی کر رہے ہیں اور اپنی بہترین فٹنس اور لگن کے باعث دنیا بھر میں پہچانے جاتے ہیں۔ ان کی کامیابی نے یہ ثابت کر دیا کہ محنت اور عزم کسی عمر کے پابند نہیں ہوتے۔

آئی جی خیبرپختونخوا ذوالفقار حمید نے اعجاز احمد کو شاندار کامیابی پر خراج تحسین پیش کرتے ہوئے کہا کہ پولیس اہلکار صرف ملک کا دفاع ہی نہیں کرتے بلکہ کھیلوں میں بھی پاکستان کا نام عالمی سطح پر روشن کر رہے ہیں۔ انہوں نے کہا کہ نوجوانوں کو کھیلوں کی طرف راغب کرنا ان کی صلاحیتوں کو نکھارتا ہے اور معاشرے میں مثبت رجحانات کو فروغ دیتا ہے۔

آئی جی کے مطابق خیبرپختونخوا پولیس اپنے بہترین صلاحیتوں کے حامل جوانوں کو کھیلوں کے بین الاقوامی مقابلوں میں شرکت کے مواقع فراہم کرتی رہے گی تاکہ وہ پاکستان کا پرچم مزید بلند کر سکیں۔