نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر نے جنوبی پنجاب کے مختلف علاقوں میں شدید بارش اور تیز ہواؤں کے خطرے کے پیش نظر الرٹ جاری کر دیا ہے۔

جاری کردہ الرٹ کے مطابق آئندہ 24 سے 48 گھنٹوں کے دوران بعض علاقوں میں گرج چمک کے ساتھ موسلا دھار بارش اور آندھی کا سلسلہ وقفے وقفے سے جاری رہنے کا امکان ہے۔

این ڈی ایم اے کے مطابق متاثرہ علاقوں میں بہاولپور، بہاولنگر، احمدپور، لیاقت پور، ظاہر پیر، راجن پور، خان پور، مظفر گڑھ، ڈیرہ غازی خان، رحیم یار خان اور صادق آباد شامل ہیں، جہاں شدید بارشوں کا خدشہ ظاہر کیا گیا ہے۔

محکمۂ موسمیات اور ہنگامی اداروں نے خبردار کیا ہے کہ شدید بارش کے باعث پہاڑی علاقوں میں ندی نالے بپھر سکتے ہیں جبکہ لینڈ سلائیڈنگ کے بھی امکانات موجود ہیں۔

اس کے علاوہ نشیبی علاقوں میں سیلابی صورتحال پیدا ہونے اور زیر آب آنے کا خدشہ ہے۔

انتظامیہ نے شہریوں کو تاکید کی ہے کہ وہ طوفانی ہواؤں کے دوران درختوں اور کمزور عمارتوں کے قریب جانے سے گریز کریں کیونکہ تیز ہوائیں درختوں کو گرا سکتی ہیں اور بجلی کا نظام بھی متاثر ہو سکتا ہے، جس سے جانی و مالی نقصان کا خطرہ بڑھ جاتا ہے۔

مزید یہ کہ گرد و غبار اور بارش کے باعث حد نگاہ میں کمی کا امکان ہے، جس سے ٹریفک حادثات کے خدشات بڑھ سکتے ہیں۔

 عوام سے کہا گیا ہے کہ وہ بارش کے دوران غیر ضروری سفر سے پرہیز کریں اور اگر سفر ضروری ہو تو انتہائی احتیاط سے گاڑی چلائیں۔

شہریوں کو ہدایت دی گئی ہے کہ اپنی گاڑیاں محفوظ مقامات پر کھڑی کریں اور مقامی انتظامیہ کی طرف سے جاری کردہ ہدایات پر مکمل عمل درآمد کریں تاکہ کسی بھی ممکنہ نقصان سے بچا جا سکے۔

این ڈی ایم اے نے عوام سے اپیل کی ہے کہ وہ الرٹ کو سنجیدگی سے لیں، موسمی اپ ڈیٹس پر نظر رکھیں اور کسی بھی ہنگامی صورتحال میں فوری طور پر متعلقہ اداروں سے رابطہ کریں۔