کراچی: بابائے قوم قائداعظم محمد علی جناحؒ کی 77ویں برسی کے موقع پر وزیراعلیٰ سندھ سید مراد علی شاہ نے کابینہ کے اراکین کے ہمراہ مزارِ قائد پر حاضری دی، پھولوں کی چادر چڑھائی اور فاتحہ خوانی کی۔

بعدازاں میڈیا سے گفتگو کرتے ہوئے وزیراعلیٰ سندھ نے کہا کہ قائداعظم کے وژن پر چلتے ہوئے پاکستان کو ایک اسلامی فلاحی ریاست بنایا جائے گا۔ انہوں نے کہا کہ پاکستان کی بقا اور ترقی قائد کے اصولوں پر عمل کرنے میں ہے، اور انہی اصولوں پر چل کر ملک کو ترقی کی راہ پر گامزن کریں گے۔

مراد علی شاہ نے کہا کہ پاکستان اس وقت شدید سیلابی صورتحال سے دوچار ہے، تاہم تمام انتظامات مکمل ہیں اور ہماری اولین ترجیح لوگوں کی جانیں بچانا ہے۔ سیلابی چیلنج سے نمٹنے کے لیے افواجِ پاکستان اور قوم مل کر کام کر رہی ہیں۔ انہوں نے کہا کہ تنقید مثبت ہونی چاہیے تاکہ خامیوں کا ازالہ کیا جا سکے، کیوں کہ سیلاب جیسے بحران سے اکیلے نہیں نمٹا جا سکتا، اس کے لیے پوری قوم کا تعاون ضروری ہے۔

انہوں نے مزید کہا کہ بلاول بھٹو زرداری نے سیلاب متاثرہ علاقوں کا دورہ کیا اور زرعی و موسمیاتی ایمرجنسی نافذ کرنے کی تجویز دی ہے۔ ان کا کہنا تھا کہ بلاول بھٹو نے عالمی سطح پر پاکستان کا مؤقف اجاگر کیا اور آج پاکستان پوری دنیا میں سرخرو ہے۔

وزیراعلیٰ سندھ نے کہا کہ ہماری افواج اور عوام نے بھارتی جارحیت کا ہمیشہ بھرپور جواب دیا ہے۔ اس موقع پر انہوں نے اسرائیل کی جانب سے قطر پر حملے کی شدید مذمت بھی کی اور کہا کہ ماحولیاتی تبدیلی کے خلاف سب کو مل کر کام کرنا ہوگا۔

انہوں نے آخر میں دعا کی کہ اللہ تعالیٰ مشکل وقت میں پاکستان کی حفاظت فرمائے اور قوم کو متحد رکھے تاکہ ہر آزمائش کا مقابلہ کیا جا سکے۔