معروف امریکی طیارہ ساز کمپنی بوئنگ نے اپنے مقبول مگر متنازع 737 میکس ماڈل کی جگہ نیا نیرو باڈی (narrow-body) اور سنگل آئزل (single-aisle) طیارہ تیار کرنے کا منصوبہ شروع کر دیا ہے، جس میں کم از کم 15 فیصد ایندھن کی بچت کو بنیادی ہدف قرار دیا گیا ہے۔

وال اسٹریٹ جرنل کی رپورٹ کے مطابق یہ نیا طیارہ فی الحال ابتدائی مراحل میں ہے اور فیڈرل ایوی ایشن ایڈمنسٹریشن (FAA) کی منظوری کا منتظر ہے۔

اگرچہ یہ منصوبہ عوامی سطح پر باضابطہ طور پر اعلان نہیں کیا گیا، لیکن کمپنی اس پر بھرپور کام کر رہی ہے۔

بوئنگ کے سی ای او کیلی اورٹبرگ نے اس منصوبے کے لیے اپنے کمرشل ایوی ایشن بزنس یونٹ میں ایک سینئر پراڈکٹ چیف تعینات کیا ہے، جو نئے طیارے کی تیاری کی نگرانی کریں گے۔

فروری میں اورٹبرگ نے برطانیہ میں رولز روئس کے سی ای او طوفان ایرگن بیلیک سے ملاقات کی، جس میں نئے انجن کی فراہمی سے متعلق ابتدائی بات چیت کی گئی۔

ستمبر میں ایک سرمایہ کار تقریب کے دوران ایرگن بیلیک نے کہا تھا کہ یہ نیا طیارہ کمپنی کے ترقیاتی مستقبل کی سمت کی نمائندگی کرے گا۔

بوئنگ کے مطابق وہ اس وقت تقریباً 6,000 بیک لاگ آرڈرز پر توجہ دے رہا ہے، جن کی ڈیلیوری اور سرٹیفکیشن جاری ہے، تاہم کمپنی کا کہنا ہے کہ وہ نئے طیارے کی تیاری کے لیے بھی پوری طرح تیار ہے۔

نئے ماڈل میں جدید انجن آرکیٹیکچر، ہلکے مواد سے تعمیر، اور فوزیلاج کے ڈیزائن میں نمایاں تبدیلیاں شامل ہوں گی، جن پر اندازاً اربوں ڈالرز کی لاگت آئے گی۔

بوئنگ یہ منصوبہ ان دو ہولناک فضائی حادثات کے بعد شروع کر رہا ہے جن میں 737 میکس ماڈل ملوث رہا۔

اکتوبر 2018 اور مارچ 2019 کے ان حادثات میں مجموعی طور پر 346 افراد جاں بحق ہوئے تھے، جس کے بعد دنیا بھر میں اس ماڈل کے طیارے گراؤنڈ کر دیے گئے تھے۔

بعد ازاں بوئنگ نے 2021 میں ایف اے اے کی نگرانی قبول کی اور 2.5 ارب ڈالر جرمانہ اور ہرجانہ ادا کرنے پر بھی رضامندی ظاہر کی۔

واضح رہے کہ اسی سیریز کا ایک اور طیارہ بوئنگ 737-800 بھی 29 دسمبر 2024 کو حادثے کا شکار ہوا، جو جنوبی کوریا کی تاریخ کا سب سے ہلاکت خیز فضائی سانحہ قرار دیا گیا۔

ان واقعات کے بعد کمپنی نے اپنے انتظامی ڈھانچے اور حفاظتی اقدامات میں کئی بڑی تبدیلیاں کی ہیں، اور اب وہ اپنی ساکھ کی بحالی اور یورپی حریف ایئربس سے چھنی ہوئی مارکیٹ واپس حاصل کرنے کی کوششوں میں مصروف ہے۔