دنیا کا سب سے بڑا آپریشنل کارگو جہاز، انتونوف 225 جسے یوکرینی زبان میں “مریا” یعنی “خواب” کہا جاتا ہے، اپنی طاقت اور بے مثال ڈیزائن کے باعث آج بھی دنیا بھر میں منفرد پہچان رکھتا ہے۔

یہ دیو ہیکل طیارہ نہ صرف اپنے سائز بلکہ ریکارڈز کے حوالے سے بھی ناقابلِ یقین تاریخ رکھتا ہے۔

انتونوف 225 کی لمبائی 84 میٹر، بازوؤں کا پھیلاؤ 88 میٹر اور اونچائی 18 میٹر ہے، جو کسی چھ منزلہ عمارت جتنی ہے۔

یہ چھ انجنوں والا دنیا کا واحد طیارہ ہے جس کی کارگو صلاحیت 250 ٹن اور زیادہ سے زیادہ ٹیک آف وزن 640 ٹن ہے۔

اس کے مقابلے میں دنیا کا سب سے بڑا مسافر جہاز، ایئربس A380 بھی چھوٹا دکھائی دیتا ہے۔

یہ طیارہ سوویت یونین نے 1988 میں بنایا تھا تاکہ اپنے خلائی شٹل بوران کو قزاقستان کے بائیکانور اسپیس سینٹر تک پہنچا سکے۔

 1989 میں اس نے ایک ہی دن میں وزن، فاصلہ اور بلندی کے 106 عالمی ریکارڈ قائم کیے۔ سوویت یونین کے زوال کے بعد اسے کچھ عرصے کے لیے بند کر دیا گیا، لیکن 2001 میں اسے دوبارہ تجارتی کارگو پروازوں کے لیے فعال کیا گیا۔

حالیہ برسوں میں انتونوف کو جنوبی امریکا کے سب سے بڑے کارگو مشن پر بھیجا گیا، جہاں اسے چلی سے بولیویا تک بجلی گھروں کے بوائلرز پہنچانے کا کام سونپا گیا۔

ہر بوائلر کا وزن 300 ٹن تھا جسے دو حصوں میں تقسیم کر کے 12 چکر میں پہنچانا تھا۔ یہ پروازیں انڈیز کی بلند پہاڑیوں (6,500 میٹر) کو عبور کرتے ہوئے صرف 90 منٹ میں اپنی منزل تک پہنچتی تھیں، لیکن لوڈنگ اور ان لوڈنگ کے عمل میں کئی گھنٹے لگ جاتے۔

کارگو لوڈ کرنے کے لیے طیارے کی ناک اوپر اٹھائی جاتی ہے اور بھاری اسٹیبلائزر اس کا وزن سنبھالتے ہیں۔

پھر خصوصی ریل سسٹم اور کرینوں کے ذریعے 150 ٹن کا سامان اندر منتقل کیا جاتا ہے۔ ایک لمحے کی غلطی لاکھوں یورو کے نقصان کا باعث بن سکتی ہے۔ اسی لیے عملہ انتہا درجے کی احتیاط اور مہارت کا مظاہرہ کرتا ہے۔

انتونوف کا کاک پٹ اب بھی “ریٹرو” انداز کا ہے، زیادہ تر سسٹم اینالاگ ہیں۔ لیکن انجینئرز اسے مسلسل اپ گریڈ کر کے جدید معیار پر رکھتے ہیں۔ اس کا ہر پرزہ قابلِ رسائی اور مرمت کے قابل بنایا گیا ہے تاکہ دنیا کے کسی بھی کونے میں فوری مسائل حل ہو سکیں۔

انتونوف 225 صرف ایک جہاز نہیں بلکہ انجینئرنگ کا شاہکار اور یوکرین کی پہچان ہے۔ اپنے منفرد ڈیزائن، ناقابلِ یقین طاقت اور تاریخی اہمیت کے باعث یہ آج بھی ہر پائلٹ کا خواب ہے کہ وہ اس کا حصہ بنے۔