وزیراعلیٰ سندھ سید مراد علی شاہ نے 12 ربیع الاول، جشنِ میلادالنبی ﷺ کے بابرکت موقع پر قوم کو مبارکباد دیتے ہوئے کہا ہے کہ نبی کریم حضرت محمد مصطفیٰ ﷺ کی دنیا میں آمد انسانیت کے لیے سب سے بڑی رحمت ہے۔

 آپ ﷺ کی تعلیمات نے دنیا کو جہالت، ظلم، اور نفرت سے نکال کر علم، انصاف اور بھائی چارے کی روشنی عطا کی۔

وزیراعلیٰ نے کہا کہ آج کے دن ہمیں اس بات کا عہد کرنا چاہیے کہ ہم اپنی زندگیاں سیرتِ طیبہ ﷺ کے مطابق ڈھالیں۔

نبی کریم ﷺ نے ہمیں مساوات، اخوت، رواداری اور خدمتِ خلق کا درس دیا، اور یہی اقدار ایک پرامن اور مضبوط معاشرے کی بنیاد ہیں۔

مراد علی شاہ نے اپنے پیغام میں کہا کہ جشنِ میلادالنبی ﷺ منانے کا حقیقی تقاضا یہی ہے کہ ہم صرف تقاریب تک محدود نہ رہیں، بلکہ ضرورت مندوں کی خدمت کو عبادت سمجھتے ہوئے معاشرے میں حقیقی تبدیلی لائیں۔

وزیراعلیٰ نے حالیہ سیلابی صورتحال کا ذکر کرتے ہوئے کہا کہ قوم ایک سنگین آزمائش سے گزر رہی ہے، اور ان حالات میں متاثرہ خاندانوں کی مدد ہر فرد کی مشترکہ ذمہ داری ہے۔

انہوں نے کہا کہ ہمیں نبی اکرم ﷺ کی تعلیمات سے رہنمائی لیتے ہوئے ایثار، قربانی اور ہمدردی کا مظاہرہ کرنا ہوگا۔

مراد علی شاہ نے دعا کی کہ اللہ تعالیٰ پاکستان کو سیلاب کی تباہ کاریوں سے محفوظ رکھے، متاثرہ افراد کو صبر عطا فرمائے، اور ہمیں ان کی مدد کے لیے توفیق دے۔

انہوں نے کہا کہ سندھ حکومت عوام کی بحالی اور فلاح کے لیے ہر ممکن اقدامات کر رہی ہے اور کرتی رہے گی۔

وزیراعلیٰ نے اس موقع پر تمام شہریوں سے اپیل کی کہ وہ جشنِ میلادالنبی ﷺ کے موقع پر اخلاق، صبر، تحمل، اتحاد اور ہمدردی کو فروغ دیں، کیونکہ یہی وہ صفات ہیں جو نبی کریم ﷺ کی تعلیمات کا نچوڑ ہیں۔