امریکا اور برطانیہ نے تجارتی تعاون کے ایک اہم سنگِ میل کو عبور کرتے ہوئے نئے دوطرفہ تجارتی معاہدے پر دستخط کر دیے ہیں۔

معاہدے پر دستخط کے بعد امریکی صدر ڈونلڈ ٹرمپ اور برطانوی وزیراعظم کیئر اسٹارمر نے مشترکہ پریس کانفرنس سے خطاب کیا۔

برطانوی وزیراعظم نے کہا کہ امریکا ہمارا سب سے بڑا تجارتی شراکت دار ہے اور یہ نیا معاہدہ دونوں ممالک کی معیشتوں کو مزید مستحکم کرنے میں اہم کردار ادا کرے گا۔

انہوں نے مزید کہا کہ برطانیہ اور امریکا 25 لاکھ سے زائد ملازمتوں کو سہارا دینے میں ایک دوسرے کا ساتھ دے رہے ہیں۔

کیئر اسٹارمر نے سابق امریکی صدر ڈونلڈ ٹرمپ کے برطانیہ کے دورے کا خیرمقدم کرتے ہوئے کہا کہ ہم ماضی کے اختلافات کو پیچھے چھوڑ کر اقتصادی ترقی کے لیے مشترکہ جدوجہد کریں گے۔

دوسری جانب امریکی صدر ڈونلڈ ٹرمپ نے معاہدے کو تجارتی محاذ پر ایک بڑی کامیابی قرار دیتے ہوئے کہا کہ برطانیہ کے ساتھ ہماری ڈیل انتہائی کامیاب رہی ہے، ٹیرف میں کمی لائی گئی ہے اور مختلف شعبوں میں اشتراکِ عمل بڑھایا جا رہا ہے۔

ٹرمپ نے اس بات پر زور دیا کہ برطانیہ اور امریکا کے درمیان رشتہ ناقابل شکست ہے، اور برطانیہ ہمیشہ ہمارا سب سے قریبی، مضبوط اور قابل اعتماد کاروباری شراکت دار رہے گا۔

معاہدے کی تفصیلات کے مطابق، دونوں ممالک تجارتی رکاوٹوں کو کم کرتے ہوئے ٹیکنالوجی، توانائی، دفاع، زراعت، اور خدمات کے شعبوں میں مشترکہ منصوبے شروع کریں گے۔

بین الاقوامی تجزیہ کاروں کے مطابق، یہ معاہدہ نہ صرف برطانیہ کی بریگزٹ کے بعد کی معاشی حکمتِ عملی کا حصہ ہے بلکہ امریکا کے لیے بھی یورپ میں اپنی موجودگی کو مزید مستحکم کرنے کا ایک اہم موقع ہے۔