اسلامی نظریاتی کونسل نے بینکوں سے رقم نکالنے اور منتقلی پر عائد ودہولڈنگ ٹیکس سے متعلق اپنے سابقہ بیان پر وضاحت جاری کرتے ہوئے مؤقف میں تبدیلی کا عندیہ دے دیا ہے۔

کونسل نے حالیہ وضاحتی اعلامیہ میں کہا ہے کہ اس معاملے پر ابھی کوئی حتمی رائے یا شرعی فیصلہ نہیں دیا گیا، بلکہ صرف چند اراکین کی ابتدائی آراء سامنے آئی تھیں، جن میں اختلاف پایا گیا۔

کونسل کے اعلامیے میں کہا گیا ہے کہ ودہولڈنگ ٹیکس کو غیر شرعی اور زیادتی قرار دینا اسلامی نظریاتی کونسل کا متفقہ اور حتمی فیصلہ نہیں تھا، بلکہ اس پر صرف محدود بحث ہوئی تھی۔

اعلامیہ کے مطابق کونسل کے آئندہ اجلاس میں اس معاملے پر سیر حاصل بحث کی جائے گی اور اس دوران متعلقہ ماہرین سے شرعی و معاشی پہلوؤں پر مشاورت بھی لی جائے گی تاکہ ایک جامع اور متوازن رائے سامنے آ سکے۔

واضح رہے کہ چند روز قبل اسلامی نظریاتی کونسل کی جانب سے جاری کردہ پریس ریلیز میں ودہولڈنگ ٹیکس کو غیر شرعی قرار دیا گیا تھا، جس پر مختلف حلقوں کی جانب سے شدید ردعمل سامنے آیا۔

تاہم اب جاری کردہ وضاحتی بیان میں اس مؤقف کی تصحیح کرتے ہوئے کہا گیا ہے کہ آج کی پریس ریلیز میں یہ تصحیح شامل کی جائے کہ کونسل کی جانب سے اس مسئلے پر تاحال کوئی باضابطہ فیصلہ نہیں کیا گیا۔

اسلامی نظریاتی کونسل نے عندیہ دیا ہے کہ متعلقہ ماہرین کی آراء کی روشنی میں ہی آئندہ کسی حتمی نتیجے تک پہنچا جائے گا۔