اسلام آباد: وزیر قانون اعظم نذیر تارڑ نے مسلم لیگ (ن) کی چیف آرگنائزر مریم نواز کے حالیہ بیانات پر معذرت کا اظہار کیا ہے۔

قومی اسمبلی میں مریم نواز کے بیانات کے خلف پیپلزپارٹی کے احتجاج کے بعد وفاقی وزیر نے معذرت کا اظہار کرتے ہوئے کہا کہ اگر کسی کی دل آزاری ہوئی ہے تو ہم معذرت خواہ ہیں۔

وزیر قانون نے واضح کیا کہ حکومت اور پارٹی قیادت افہام و تفہیم کے ذریعے ہی اختلافات کو ختم کرنے اور ملک کو درپیش چیلنجز کا مقابلہ کرنے کی پالیسی پر عمل پیرا ہیں۔

قبل ازیں، پیپلز پارٹی کے رکن سید نوید قمر نے نکتہ اعتراض اٹھاتے ہوئے کہا کہ سیلاب کی تباہ کاریوں کے بعد عوام قیادت کی طرف دیکھ رہے ہیں مگر ریلیف کے بجائے سیاست ہو رہی ہے۔ ان کا کہنا تھا کہ پچھلے چند دنوں میں دونوں طرف سے افسوس ناک بیانات آئے جن سے سیاسی ماحول مزید کشیدہ ہوا۔

نوید قمر نے وزیراعلیٰ پنجاب کی تقریر پر سخت ردعمل دیتے ہوئے کہا کہ “ہمارا پانی ہماری کینال” کہنا افسوس ناک ہے، دریائے سندھ کا پانی پورے پاکستان کا ہے۔ انہوں نے خبردار کیا کہ اگر رویہ یہی رہا تو پیپلز پارٹی اپوزیشن بنچوں پر بیٹھنے پر مجبور ہو سکتی ہے۔ اس موقع پر پی پی پی ارکان نے ایوان سے واک آؤٹ کر دیا۔

وزیر قانون اعظم نذیر تارڑ نے صورتحال کو سنبھالنے کی کوشش کرتے ہوئے پیپلز پارٹی کو منانے کا اعلان کیا اور کہا کہ سیاست میں اس طرح کی باتیں ہوتی رہتی ہیں، اگر کسی کی دل آزاری ہوئی ہے تو ہم معذرت خواہ ہیں۔

ان کا کہنا تھا کہ عالمی سطح پر پاکستان کی کامیابیاں ہمارے اتحاد کا نتیجہ ہیں اور مسائل کا حل بھی افہام و تفہیم سے ہی نکلے گا۔

ایوان میں بڑھتے احتجاج کے باعث اسپیکر نے اجلاس جمعہ گیارہ بجے تک ملتوی کر دیا۔