دوحہ: وزیراعظم محمد شہباز شریف ایک روزہ دورے پر قطر کے دارالحکومت دوحہ پہنچ گئے، جہاں ایئرپورٹ پر قطر کے نائب وزیراعظم و وزیرِ مملکت برائے دفاع شیخ سعود بن عبد الرحمن بن حسن الثانی نے ان کا شاندار استقبال کیا۔

وزیراعظم کے ہمراہ پاکستانی وفد میں نائب وزیراعظم و وزیرِ خارجہ محمد اسحاق ڈار، وزیرِ دفاع خواجہ محمد آصف، وزیرِ اطلاعات و نشریات عطاء اللہ تارڑ اور معاون خصوصی طارق فاطمی شامل ہیں۔

وزیراعظم شہباز شریف اپنے دورہ کے دوران قطر کے امیر شیخ تمیم بن حماد الثانی سے ملاقات کریں گے۔ ملاقات میں وزیراعظم بلاجواز اسرائیلی جارحیت اور بین الاقوامی قوانین کی صریح خلاف ورزی پر پاکستان کی جانب سے قطر اور اس کے عوام کے ساتھ یکجہتی کا اظہار کریں گے۔

اس موقع پر وزیراعظم اس امر پر بھی روشنی ڈالیں گے کہ قطر اور پاکستان کے درمیان تعلقات تاریخی، برادرانہ اور مشترکہ عقیدے و اقدار پر مبنی ہیں۔ پاکستان نے ہر مشکل وقت میں قطر کا ساتھ دیا ہے اور مستقبل میں بھی یہ تعاون جاری رہے گا۔

ملاقات کے دوران خطے کی موجودہ صورتحال، اسرائیل کی جانب سے مختلف ممالک پر جارحانہ اقدامات اور امن کے قیام کے حوالے سے باہمی مشاورت بھی کی جائے گی۔