کراچی: گلستان جوہر کے علاقے بھٹائی آباد میں خاندانی تنازع پر خنجر کے وار سے تین خواتین قتل جبکہ ایک بچی سمیت دو افراد زخمی ہو گئے۔

بول نیوز کے مطابق گلستان جوہر کے علاقے بھٹائی آباد میں خاندانی تنازع نے خوفناک رخ اختیار کر لیا۔ ایک شخص نے خنجر کے وار سے تین خواتین کو قتل کر دیا جبکہ ایک بچی سمیت دو افراد زخمی ہو گئے۔

ایس ایس پی ملیر ڈاکٹر عبدالخالق جائے وقوعہ پر پہنچے اور میڈیا سے گفتگو میں بتایا کہ زخمی بچی نندنی کا بیان قلمبند کر لیا گیا ہے جس کے مطابق یہ اندوہناک واردات بچی کے ماموں اجے نے انجام دی۔ ملزم نے خواتین پر حملے کے بعد خود کو بھی زخمی کر لیا اور اس کی حالت بھی تشویشناک ہے۔

پولیس حکام کے مطابق جاں بحق خواتین کی لاشیں گلہ کٹی حالت میں ملی ہیں۔ ایک اور زخمی خاتون پریا کو بھی اسپتال منتقل کیا گیا ہے، جس کے بعد ہلاکتوں کی تعداد تین اور زخمیوں کی تعداد تین ہو گئی ہے۔

اہلخانہ نے پولیس کو بیان دیا ہے کہ ملزم نشے کا عادی نہیں تھا مگر کافی عرصے سے بیروزگار تھا۔ واقعے کی وجوہات کے بارے میں ابھی تک کچھ واضح نہیں ہو سکا کیونکہ زخمی بچی کی حالت تفصیلی بیان دینے کے قابل نہیں ہے۔

ایس ایس پی ملیر کے مطابق کرائم سین یونٹ اور ٹیکنیکل ٹیمیں جائے وقوعہ سے شواہد اکٹھے کر رہی ہیں جبکہ تفتیش کے لیے خصوصی ٹیمیں تشکیل دے دی گئی ہیں۔ پولیس اہل علاقہ اور اہل خانہ کے مزید بیانات بھی ریکارڈ کرے گی تاکہ واقعے کی اصل وجوہات سامنے آ سکیں۔