میکسیکو سٹی: وسطی میکسیکو میں ایک فریٹ ٹرین اور ڈبل ڈیکر مسافر بس کے خوفناک تصادم کے نتیجے میں کم از کم 10 افراد ہلاک اور 61 زخمی ہوگئے۔

امریکی میڈیا نے ریل کمپنی کے حوالے سے رپورٹ کیا ہے کہ بس نے چلتی ہوئی ٹرین کے سامنے سے گزرنے کی کوشش کی تھی۔

جائے حادثہ سے جاری تصاویر میں بس کی اوپری منزل کا اگلا حصہ مکمل طور پر کچلا ہوا دکھائی دیتا ہے، جبکہ اس کا لوہے کا فریم بری طرح مڑ گیا تھا۔ امدادی ٹیموں نے علاقے کو گھیرے میں لے کر زخمیوں کو اسپتال منتقل کیا۔

ریاستِ میکسیکو کے اٹارنی جنرل کے دفتر کے مطابق ہلاک شدگان میں سات خواتین اور تین مرد شامل ہیں۔ زخمیوں میں سے کچھ کی حالت تشویشناک بتائی گئی ہے، جبکہ چند کو ابتدائی طبی امداد کے بعد اسپتال سے فارغ کر دیا گیا۔

میکسیکو اور لاطینی امریکا میں مہلک بس حادثے عام ہیں۔ سرکاری اعداد و شمار کے مطابق صرف 2023 میں وفاقی شاہراہوں پر 12,099 تصادم ہوئے، جن میں تقریباً 1,900 افراد جان سے گئے اور 6,400 زخمی ہوئے، جبکہ نقصان کی مالیت 100 ملین ڈالر سے زائد رہی۔

فروری میں بھی جنوبی میکسیکو میں ایک بس، جو کینکون سے تباسکو جا رہی تھی، ٹریلر ٹرک سے ٹکرا کر آگ لگنے سے جل گئی تھی، جس میں 40 سے زائد مسافر جاں بحق ہوئے۔

میکسیکو میں بسیں سفر کا بنیادی ذریعہ ہیں کیونکہ اگرچہ فریٹ ٹرینیں عام ہیں مگر مسافر ریل کے روٹس محدود ہیں۔